«Zeket jáne qaıyrymdylyq» qorynyń onlaın jıyny ótti (FOTO)
QMDB «Zeket jáne qaıyrymdylyq» qorynyń oblys, óńirlerdegi 19 ókilimen zeket jáne qaıyrymdylyq is-sharalaryn jandandyrý maqsatynda onlaın jınalys ótti.
Jıyn barysynda 2021 jyldyń qańtar, aqpan aılarynda respýblıka boıynsha atqarylǵan qaıyrymdylyq is-sharalary qorytyndylandy. «Zeket jáne qaıyrymdylyq» qorynyń dırektory Talǵat Omarov zeket ókilderiniń eki aıda atqarǵan eńbekterin joǵary baǵalap, alǵysyn bildirdi.
QMDB tóraǵasy Bas múftı Naýryzbaı qajy Taǵanulynyń bastamasymen osy aıda ótetin aýqymdy «Kóshpeli qaıyrymdylyq» aktsııasynda aýyldyq aımaqtarda turatyn muqtaj otbasylardyń qaıyrymdylyq kómekpen qamtamasyz etilýi talqylanyp, baǵyt-baǵdar berildi. Óıtkeni Bas múftı «Zeket jáne qaıyrymdylyq» qoryna oblys ortalyqtary men aýdandarmen qatar, shalǵaıda jatqan aýyldar men eldimekenderde turatyn muqtaj otbasylarǵa da kómek jetýin qadaǵalaýdy tapsyrǵan bolatyn.
Sondaı-aq «El úlesi – páterge» jobasyn birizdilikke túsirý, zeketti nasıhattaý jáne t.b. aýqymdy is-sharalar jóninde áńgime órbidi.
