Túrkııa múftıi Oraza aıtpen quttyqtady

Túrkııa Respýblıkasy Din isteri basqarmasynyń tóraǵasy professor, doktor Álı Erbash QMDB tóraǵasy, Bas múftı Naýryzbaı qajy Taǵanulyna Oraza aıt merekesimen quttyqtaý hatyn joldady.

Ol álemge taralǵan indetke baılanysty meshitterde jamaǵat namazdary oqylmaı, aýyzashar dastarhanynda musylmandardyń basy qosylmasa da, ortaq duǵada bolyp, osy Qasıetti aıdy muqtaj jandarǵa erekshe kóńil bólýmen ótkizgenimizdi aıryqsha atap ótken.

«...Sondaı-aq, Uly Allanyń pák ekenin uǵýǵa, oılanýǵa jáne Islamnyń tazalyq, adal men aramnyń arajigi ajyratylǵan din ekenin, onyń ondaǵan hıkmetin sezinýge múmkindik týǵanyna senemin.            

Álemdi jaýlap adamzatqa qaýip tóndirgen Koronavırýs (COVID-19) indetiniń jyldam aıaqtalýyn tileı otyryp, Ózińiz basshylyq etetin, Qazaqstandaǵy búkil musylman baýyrlardy  bıylǵy Oraza Aıtpen quttyqtaımyn. Bul erekshe kúnderde Islam áleminde jáne baýyrlas elderimizde tynyshtyq, beıbitshilik jáne amandyq bolýyn shyn nıetpen tileımin», - deıdi professor Á.Erbash.