Tikeleı Efırde «Oraza aıt – ulyq mereke» baǵdarlamasy ótti (FOTO+VIDEO)

Búgin ısi musylman balasynyń erekshe eki merekesiniń biri Oraza aıt meıramyna oraı Qazaqstan musylmandary dinı basqarmasy kópshilik nazaryna nasıhattyq onlaın baǵdarlamasyn usyndy.

«Oraza aıt – ulyq mereke» degen taqyrypta bir jarym saǵatqa sozylǵan tikeleı Efır QMDB Tóraǵasy, Bas múftı Naýryzbaı qajy Taǵanulynyń musylman qaýymyn Oraza aıt merekesimen quttyqtaýymen bastaldy.

Budan bólek, Dıhan Qamzabekuly, Álıhan Baımenov syndy el aǵalary merekelik lebizin bildirip, Qazaq elin ulyq merekemen quttyqtady.

Tikeleı Efır kezinde QMDB Tóraǵasynyń orynbasary, naıb múftı Ershat Aǵybaıuly aıttyń shyǵý tarıhyna toqtalsa, QMDB Sharıǵat jáne pátýa bóliminiń meńgerýshisi Sansyzbaı Qurbanuly aıttyń sharıǵattaǵy orny jaıly oı qozǵady. Ásirese, karantınge baılanysty aıt namazynyń oqylmaıtynyn, úıde jeke duha namazyn oqyp, duǵa tileý jóninde aıtyp, tolyǵyraq túsindirip ótti.

Sondaı-aq, dál osy duha namazynyń oqylý úlgisin «Áziret Sultan» meshitiniń bas ımamy Erbolat Júsipov kórsetip berse, QMDB Ýaǵyz-nasıhat bóliminiń meńgerýshisi Batyrjan Mansurov «Karantın jaǵdaıynda aıt merekesin qalaı ótkizýi kerek?» degen suraqqa tolyqqandy jaýap berdi.

Nasıhattyq baǵdarlama barysynda «Ramazandaǵy muń», «Qosh bol, Ramazan» beınerolıkteri de kórsetildi.

Barshańyzdy Oraza aıt merekesimen quttyqtap, shańyraqtaryńyzǵa shattyq, otbasylaryńyzǵa amandyq pen bereke tileımiz! Ramazannan ramazanǵa, aıttan aıtqa aman-esen jete bereıik!