Rátbek qajy atyndaǵy aýdıtorııa ashyldy (FOTO)
Nur-Múbarak ýnıversıtetinde Qazaqstan musylmandary dinı basqarmasynyń tuńǵysh tóraǵasy Rátbek qajy Nysanbaıuly atyndaǵy aýdıtorııa ashyldy.
Bul jańalyq ásirese stýdentterge qýanysh syılady. Sebebi jańadan jasalǵan dáris zaly zamanaýı tehnologııalarmen jabdyqtalǵan. Tehnologııalyq «taqta» ári Smart-LED, kez kelgen shyǵarmashylyq múmkindikti júzege asyrýdyń san túrli tásilin qamtyǵan, ǵalamtormen ońtaıly jumys isteý, eń bastysy jańa dáristi tez ári tıimdi jolmen úırenýge múmkindigi mol aýdıtorııa kópshilikti tánti etti.
Sý jańa dáris zalynyń tusaýyn QMDB Tóraǵasy, Bas múftı Naýryzbaı qajy Taǵanuly men elimizdiń tuńǵysh bas múftıi Rátbek qajy Nysanbaıuly qıyp, alǵashqy qadam jasap, shashý shashyldy. Nur-Múbarak ýnıversıtetiniń prorektory, dotsent Qaırat Qurmanbaev jańa aýdıtorııanyń ereksheligimen tanystyryp, kelgen qonaqtar ýnıversıtettiń eń alǵashqy irgetasy qalanǵan 1993 jylǵy tarıhı sáttegi beınematerıaldy tamashalady. Bas múftı Naýryzbaı qajy Taǵanuly tarıhtan taǵylym alyp, qarııalaryn qurmettegen eldiń bolashaǵy zor degen rızashylyǵyn jetkizdi.
Rektor, professor Mýhammad ásh-Shahhat bastaǵan zııaly top tuńǵysh bas múftı Rátbek qajy Nysanbaıulyna ustazdyń oryndyǵyn usynyp, abyz aqsaqalǵa árdaıym ýnıversıtet esigi ashyq ekenin aıtyp, qurmet bildirdi. Seksenniń seńgirine shyqqan Rátbek qajy Nysanbaıuly elimizdegi din bilimin ata-babamyzdyń jolyna saı bilikti ǵalymdar ustaýy kerek degen sonaý keńestik kezeńdegi basty ustanymyn jandandyryp otyrǵan Nur-Múbarak ýnıversıtetiniń ujymyna rııasyz rızashylyǵy men batasyn berdi.
