Qorytyndy: Sapardyń sáýleli sátteri (FOTO)
Jýyrda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Mańǵystaý oblysyna resmı saparmen bardy.
Mańǵaz Mańǵystaý sapary aımaq basshysy Serikbaı Ótelgenulymen kezdesýden bastaldy. Kezdesýge QMDB tarapynan Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, Mańǵystaý oblysynyń Bas ımamy Ánýar Izimbaıuly qatysty. Oblys basshysy kıeli meken – Mańǵystaýǵa is-saparmen kelgen Bas múftı bastaǵan delegatsııanyń qadamyn jaqsylyqqa balap, ıgi nıetin jetkizdi.
Resmı basqosýda óńirdegi dinı ahýal sóz bolyp, din qyzmetkerleriniń bilimin jetildirý, olarǵa áleýmettik qoldaý kórsetýdiń mańyzy talqylandy. Sonymen qatar jastar arasynda dinı ońaltý jumystaryn júıeli júrgizý máselesi de nazardan tys qalmady.
Serikbaı Ótelgenuly izgilik jolyndaǵy bastamalar men ıgi qyzmette júrgen ımamdardy qoldaý ortaq is ekenin jetkizdi. «Mańǵystaý oblysyndaǵy dinı ahýal – meniń jiti nazarymda. Sondyqtan osy óńirdegi ımamdardyń bilimin shyńdap, tájirıbesin arttyrýǵa mańyz berip kelemin. Endigi maqsat – eldiń ıgiligi men halyqtyń bolashaǵy jolynda birlese otyryp qyzmet etý. Osy baǵytta sizdermen yntymaqtasa otyryp, ortaq sharalardy atqarýdyń mańyzy erekshe», – dedi Bas múftı Naýryzbaı qajy Taǵanuly.
Kezdesý sońynda taraptar dinı saladaǵy jobalardy júzege asyrýǵa, dinı ońaltý sharalarynda yntymaqtastyq tanytýǵa ýaǵdalasty.
Oblys ákiminiń resmı qabyldaýynan keıin Bas múftı Aqtaý qalasynda ımamdarǵa dáris oqyp, dinı salada jınaqtaǵan tájirıbesimen bólisti.
«Zııatker ımam kelbeti» taqyrybynda órbigen dáriste QMDB Tóraǵasy din qyzmetkeriniń jaýapkershiligine toqtaldy. «Imamnyń ár sáti – jaýapkershilik. Óıtkeni biz Allanyń amanatyn arqalap júrgen janbyz. Halyqty ımandylyqqa úndeıtin ımamnyń boıynda izgilik qundylyqtary únemi kórinis taýyp otyrýy tıis. Ózara uıymdasyp dinge, halyqqa qyzmet etýde yjdahat tanytyp, belsendi bolyńyzdar. Halyqqa qyzmet etýden asqan ǵazız nárse joq. Adamnyń alǵysyn alǵan pende Allanyń da rızalyǵyna bólenedi. Barshańyzdy jurtqa jaqsylyq jasaýda ózara jarysýǵa shaqyramyn» dedi Bas múftı.
Sonymen qatar ol dáriste din qyzmetkerlerin áleýmettik jeliniń áleýeti men ıgiligin tıimdi paıdalanýǵa úndedi.
Osy kezdesýden keıin Bas múftı Shopan ata, Beket ata zırattarynda bolyp, áýlıe babalarǵa zııarat jasap, Quran baǵyshtady. Zııarat jasaý barysynda jergilikti ımamdarmen suhbattasqan Naýryzbaı qajy Taǵanuly: «Bir ǵulama «Halyqty oıatqyń kelse, onyń tarıhyn oıat» degen eken. Biz jastardy qulshylyqqa qulshyndyryp qana qoımaı, olardy tarıhymyzben de tárbıeleýimiz kerek» dedi.
Sapardyń ekinshi kúni Naýryzbaı qajy Taǵanuly Jańaózen qalasynyń ákimi Maqsat Ońǵarbaıulymen kezdesip, óńirdegi dinı ahýaldy talqylady.
«Qazaqstan musylmandary dinı basqarmasy óziniń dinı qyzmetinde 4 baǵytqa basymdyq beredi. Sonyń biri – jastardy jat aǵymnyń arbaýynan saqtap, olarǵa dinı ońaltý jumystaryn júrgizý. Jasyratyny joq, keıde osy óńirdegi keıbir jekelegen azamattar múftııat pátýasyna qaıshy amaldarǵa baryp qoıady. Osy óńirge QMDB Ǵulamalar keńesiniń birneshe ǵalymyn ákelip, túsindirý jumystaryna kirisip kettik. Ózim de jekeleı kezdesýlerge qatysyp, múftııat ustanymy men memleket talabyn túsindirdim. Osynaý sharalarǵa ákimdik tarapynan da tıisti qoldaý qajet» dedi Bas múftı.
Óz kezeginde qala basshysy Maqsat Ońǵarbaıuly ortaq iske ákimdik tarapynan qoldaý kórsetiletinin jetkizdi.
Úlkenniń batasyn alyp, alǵysyna bólený – dinimiz ben dástúrimizde bar qundylyqtyń biri. Alla Taǵala ata-ananyń aqysy men qurmetin Ózinen keıingi orynǵa qoıǵan. Sapar aıasynda Bas múftı Jańaózen qalasynda birtop qarııamen kezdesip, suhbattasyp, aqsaqaldyń aq batasyn aldy.
Osy sáýleli sátten soń Naýryzbaı qajy Taǵanuly Dinı basqarmanyń 30 jyldyq mereıtoıyna oraı 30 stýdentke qoldaý kórsetý ıgi jobasy aıasynda Jańaózen qalasynda qos shákirtke bilim grantyn tabystady. QMDB bilim grantyn ıelengen qos shákirttiń biri – Aıdos Bolatuly – «Nur-Múbárak» ýnıversıtetiniń birinshi kýrs stýdenti, ekinshisi – Qýanysh Saıdolla – Almatydaǵy «Ábý Hanıfa» medrese-kolledjiniń ekinshi kýrs shákirti.
Sapar taǵy bir saýapty amalǵa ulasty. Bas múftı jastaıynan taǵdyr taýqymetin tartyp, synaqqa dýshar bolǵan Jańaózen qalasynyń turǵyny Serik Saǵyzbaevty erekshe qýanyshqa bóledi. Oǵan jattyǵý jasaýǵa arnalǵan velosıpedti óz qolymen tabystap, Alladan shıpa surap, duǵa jasady. Qýanyshtan kózine jas alǵan Seriktiń anasy alǵysyn aıtyp, batasyn berdi.
Osydan keıin QMDB Tóraǵasy Naýryzbaı qajy Taǵanuly Mańǵystaý oblysy Munaıly aýdanyndaǵy «Mıǵraj» meshiti aýlasynda salynǵan turǵyn úıdiń ashylý saltanatyna qatysyp, baspanaly bolǵan 8 din qyzmetkerin jańa qonysymen quttyqtady.
«Adam balasy úshin baspananyń orny erekshe. Úı – sharshaǵanda tynyǵatyn, qulshylyq jasap, duǵa etetin, bala-shaǵańmen qaýyshyp, qýanyshqa bólenetin, qonaq kútip, batasyn alatyn mekeniń. Sondyqtan osy úıdi ıgilikke paıdalanyp, Alla jolynda aıanbaı qyzmet etińizder» dedi.
Osynaý qýanyshty sátten soń Bas múftı 6 jasar Jiger Berikbaıulymen kezdesti. Zerek balamen suhbattasyp, ony maqtaý qaǵazymen marapattap, syılyǵyn tabystady.
Naýryzbaı qajy Taǵanuly sapar josparyna sáıkes «Mıǵraj» meshiti aýlasynda salynyp jatqan sport keshenin aralap, qurylysymen tanysyp: «Jamaǵatty bir maqsatqa jumyldyratyn saýapty hám salaýatty sharalar kóp. Sonyń biri – sporttyq shara. Din qyzmetkerleri salaýatty ómirdiń nasıhatshysy da bolýy qajet» dedi.
Sapar «Úmmet jastary» qaıyrymdylyq qorynyń jumys esebin tyńdaýmen jalǵasty. Bas múftı qordyń eriktiler tobyna aıryqsha alǵysyn bildirip, batasyn berdi. «Úmmet jastary» osyǵan deıin 10 otbasyǵa baspana kiltin tabystap, 4 myńǵa jýyq januıaǵa qaıyrymdylyq kómek kórsetken.
Osydan keıin Munaıly aýdanyndaǵy «Januıa ortalyǵynda» bolǵan Bas múftı ortalyq qyzmetkerlerine: «Rasynda ata-ana – balaǵa máńgilik medrese. «Bir ákeniń tárbıesin júz mektep bere almaıdy» degen tujyrymdy sóz bar. Paıǵambarymyz Muhammed (oǵan Allanyń salaýaty men sálemi bolsyn) bir ósıetinde: «Balaǵa ákeniń berer eń jaqsy syıy – tárbıe», – degen. Bir ǵulamanyń: «Bala qymbat bolsa, tárbıesi odan da qymbat» degen sózi bar. Bala tárbıesine úles qosyp jatqan sizderge Alla razy bolsyn» degen tilegi men nasıhatyn jetkizdi.
