QMDB tóraǵasy «Jýsan» operatsııasymen elge oralǵan azamattarmen júzdesti (FOTO)
QMDB Tóraǵasy, Bas múftı Naýryzbaı qajy Taǵanuly Qaraǵandyǵa kelgen saparynda Qarabas kentindegi 159/18 túzetý mekemesine baryp, «Jýsan» gýmanıtarlyq operatsııasy arqyly elge oralǵan 5 azamatpen arnaıy kezdesti.
«Qazaqta «Adasqannyń aıyby joq, qaıta úıirin tapqan soń» degen jaqsy sóz bar. Sizderdi memleket qamqorlyǵyna alyp, qııannan elge alyp keldi. Bul –úlken qamqorlyq. Mundaı gýmanıtarlyq operatsııany jasaý arqyly elimiz ár azamattyń qymbat ekenin kórsetti. Sizder elge kelgen soń din mamanynan sabaq alyp, týralyqty ustaýǵa tıissizder. Biz jazasyn óteýshi azamattarmen jıi kezdesemiz. Imamdarymyz kelip turady. Qajetti kitap, dáris alamyn deseńizder, múmkindik joq emes. Sondyqtan ár sátti qur jibermeı, ilim alyp, aqıda, fıqh máselesinde bilikti ımamdarmen keńesý qajettigin qaperge salamyn» dedi Bas múftı.
Túzetý mekemesinde ótken kezdesý barysynda «Jýsan» operatsııasy arqyly elge oralǵan azamattar Bas múftıge saýal qoıyp, jeke máselelerin jetkizdi. Olardy tolǵandyrǵan máselelerdiń biri otbasyna materıaldyq kómek kórsetý boldy. Bas múftı jazasyn óteýshi azamattardyń otbasyna múmkindiginshe meshit tarapynan qoldaý bolatynyn aıtty.
Sondaı-aq kezdesýde atalǵan azamattar bir kezderi adasqanyn moıyndap, aǵynan jaryldy. Mazhab ustanýda jibergen qateligi úshin ókinetinin bildirdi. «Islam sharıǵatynda mazhabtyń máni tereń ekenin uǵyndyq. Qazir Ábý Hanıfa mazhaby boıynsha qulshylyq ótep júrmiz» dedi olar.
Aıta keteıik, túzetý mekemesindegi kezdesýde Dinı basqarma atynan Sharıǵat jáne pátýa bólimi meńgerýshisiniń orynbasary Hasan Amanqul, Ýaǵyz-nasıhat bóliminiń meńgerýshisi Batyrjan Mansurov bolyp, dinı bilim alýdaǵy meshittiń róli, dinı senim, sharıǵat máseleleri boıynsha nasıhat aıtyp, suraqtarǵa jaýap berdi.
