QMDB TÓRAǴASY QAJYLARDY ULY SAPARǴA ShYǴARYP SALDY
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Astanadaǵy halyqaralyq áýejaıdan qajylarymyzdyń kezekti legin qasıetti mekenge shyǵaryp saldy.
Shyǵaryp salý rásiminde Bas múftı qajylarmen júzdesip, besinshi paryzdyń ıslamdaǵy orny men mańyzyna toqtaldy.
«Allanyń qasıetti úıine bet túzep, uly saparǵa attanǵaly otyrǵan barshańyzǵa Jaratýshy Iemiz amandyq, saýlyq, mol rýhanı qýat násip etsin! Uly Rabbymyz bul saparlaryńyzdy jeńil ári qaıyrly etip, jasaǵan qajylyqtaryńyzdy qabyl bolǵan qajylyqtardyń qataryna qosqaı. Nıetterińizdi taza, júrekterińizdi nurly, qadamdaryńyzdy berekeli etsin.
Shamasy jetken árbir musylmanǵa ómirinde bir ret qajylyq jasaý – paryz. Qajylyqtyń paryz ekendigi jaıynda Quran men súnnette anyq aıtylǵan.
Bul jaıynda Alla Taǵala Quranda bylaı degen: «Allanyń úıin zııarat etýge shamasy keletin árbir adam úshin qajylyqqa barý – onyń moınyndaǵy Allanyń aqysy... » («Álı Imran» súresi, 97 aıat).
Allaǵa shúkir, elimizde qajylyq paryzyn ótep kelýshilerdiń sany jyl saıyn artyp keledi. Dini men dástúrin ardaqtaı bilgen ata-babalarymyz qajylyq saparyn ulyqtap «Uly sapar» dep ataǵan. Oǵan baryp, musylmandyq paryzyn ótep kelgen adamdy «Qajy» dep syılap, batasyn alýǵa tyrysqan. Bul – qazaq halqynyń Allanyń haq dinine degen qurmeti men ystyq yqylasynyń dáleli» dedi QMDB Tóraǵasy.
Aıta keteıik, bıyl 4000 otandasymyz qajylyq paryzyn óteıdi. Olarǵa lıtsenzııasy bar 14 qajylyq kompanııasy qyzmet kórsetedi. QMDB janynan qurylǵan Qazaqstan Qajylyq mıssııasy uıymdastyrý-úılestirý, alǵashqy medıtsınalyq kómek, ýaǵyz-nasıhat, pátýa berý jáne aqparat taratý syndy bes baǵytta qajylarǵa qyzmet kórsetedi.
