QMDB tóraǵasy Óskemende zamanaýı meshittiń qurylys jobasymen tanysty (FOTO)
Bas múftı Naýryzbaı qajy Taǵanuly Óskemen qalasynda salynyp jatqan zamanaýı jańa meshittiń qurylys jobasymen tanysty.
Meshit jobasymen Óskemen qalasynyń ákimi Jaqsylyq Omar tanystyrdy. Onyń aıtýynsha, qulshylyq úıi men dárethana arasynda arnaıy dáliz salynady. Bas múftı Naýryzbaı qajy Taǵanuly qurylys jumysynyń sapasyna, meshittiń jeke kólik turaǵynyń bolýyna nazar aýdaryp, saýapty iske belsene kirisken demeýshi azamattarǵa aıryqsha alǵysyn jetkizdi.
«Meshit – kúlli jaqsylyqtyń toǵysqan meıirimdilik mekeni. Alla úıine kelgen adamnyń júregi tynyshtyq tabady. Sizder qanshama jannyń kóńiline qýanysh, júregine tynyshtyq syılaǵaly tursyzdar. Alla ıgi isterińizge mol saýaptan jazsyn» dedi Naýryzbaı qajy Taǵanuly.
Aıta ketsek, erekshe stılde salynyp jatqan meshitte bir mezette 700 adam qulshylyǵyn óteı alady. Qurylys jumysyn 2022 jyly bitirý josparlanǵan.
