QMDB tóraǵasy oblys ımamdaryna jınalys ótkizdi (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen jınalys ótti.
Oǵan Dinı basqarmanyń bólim basshylary men Ortalyq apparat qyzmetkerleri, sondaı-aq óńirlerdiń bas ımamdary onlaın rejımde qatysty. Jıynda eldegi tótenshe jaǵdaı kezindegi din qyzmetkerleriniń atqarar jumysy talqylandy.
«Halqymyz, onyń ishinde musylman jamaǵaty Qazaqstan táýelsizdiginiń 30 jyldyq tarıhynda bolmaǵan aýyr synaqtardy bastan keshýde. Alla Taǵala osy qıyndyqty tezirek jeńildikke almastyryp, beıbit kúnimizdi baıandy etkeı.
El basyna kún týǵan osynaý syndarly sátterde elimizdiń ár túkpirindegi ár azamat birligin tanytyp, óz tarapynan qoldaý kórsetýde. Biz, din qyzmetkerleri de kún saıyn Quran hatym etip, duǵa jasap kelemiz. Imamdarymyz blokposttarda sarbazdarǵa ystyq tamaq pen azyq-túlik sebetterin taratyp, Otan úshin kóz ilmeı bekette turǵan azamattarǵa rýhanı turǵydan qoldaý kórsetýde» dedi QMDB Tóraǵasy.
Naýryzbaı qajy Taǵanuly alańǵa jınalǵan azamattarǵa Otannyń qadirin, halyq birliginiń mańyzdylyǵyn túsindirip, nasıhat jumystaryn júrgizip jatqan ımamdarǵa alǵysyn jetkizdi. Sondaı-aq eldegi qaýiptiń tolyq seıilmegenin aıtyp, Almaty qalasy men ózge de óńir bas ımamdaryna meshittegi qaýipsizdik qyzmetin kúsheıtýdi tapsyrdy.
