QMDB TÓRAǴASY KÁSIPKERLERGE ÚNDEÝ JASADY

Búgin Astanada Qurban aıt merekesine baılanysty ótken baspasóz máslıhatynda Bas múftı Naýryzbaı qajy Taǵanuly kásipkerlerge úndeý jasady.

«Men jyl basynda elimizdegi barsha din qyzmetkerlerine joldaǵan Baǵdarlyq baıandamamda qos ulyq meıramdarymyz – Qurban aıt pen Oraza aıtty dástúrimizge saı qoǵamdyq deńgeıde atap ótý qajettigin jetkizdim. Alla qalasa, aıt kúnderi «Qurban aıt – ulyq mereke» taqyrybynda respýblıkalyq deńgeıde ıgi is-sharalar uıymdastyrylady.

Oblystyq, qalalyq jáne aýdandyq meshitterdiń aýlasynda kıiz úıler tigilip, ulttyq sport túrlerinen arnaıy saıystar uıymdastyrylady. Jer-jerde mádenı-rýhanı keshter ótkiziledi. Osy rette elimizdegi barsha jamaǵatty ulttyq kıimderimizdi kıip, aıt merekesin dástúrimizge saı ulttyq naqyshtarmen ótkizýge, ıgi bastamalarymyzǵa belsendi túrde atsalysýǵa shaqyramyn.

Qurban aıt tek dinı mereke ǵana emes, qoǵamdaǵy birlik pen tatýlyqty nyǵaıtatyn, qaıyrymdylyqty pash etetin rýhanı meıram. Osy oraıda elimizdegi barsha kásipker azamattardy Qurban aıtta mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa úndeımin» dep atap ótti Naýryzbaı qajy Taǵanuly.




​