QMDB Qadir túninde onlaın baǵdarlama usynady
Búgin – Qadir túni. Qasıetti túnniń qurmetine oraı Qazaqstan musylmandary dinı basqarmasynyń «Hıkmet» stýdııasy jáne Dinı basqarmanyń youtube kanaly arqyly 00:30-dan 02:40-qa deıin «Myń aıdan da qaıyrly Qadir túni» atty onlaın baǵdarlama usynady.
Tikeleı Efır QMDB Tóraǵasy, Bas múftı Naýryzbaı qajy Taǵanulynyń Qadir túnine arnalǵan quttyqtaý sózimen ashylady. Odan ári Myrzataı Joldasbekov, Ǵarıfolla Esim, Baqytjan Ertaev t.b el aǵalary merekelik lebizin bildiredi.
Respýblıkalyq «Áziret Sultan» meshitinde 24 sáýirde bastalǵan «Ramazandaǵy Quran hatym» atty onlaın hatym oqý («Áziret Sultan» meshitiniń naıb ımamy) sharasy túıindelip, Quran hatym duǵasy jasalady. «Áziret Sultan» meshitiniń bas ımamy Erbolat Júsipov «Qulshylyq jasaýdaǵy yqylas-nıettiń orny», QMDB Ýaǵyz-nasıhat bóliminiń meńgerýshisi Batyrjan Mansurov «Zikir, salaýat jáne tasbıh aıtýdyń artyqshylyǵy», QMDB Dinı bilim jáne kadr daıarlaý bóliminiń meńgerýshisi Smaıyl Seıtbekov «Islam – meıirim dini» taqyryptarynda ýaǵyz-nasıhat aıtady.
Onlaın baǵdarlama barysynda QMDB Sharıǵat jáne pátýa bóliminiń mamany Medet Qursaqov kórermender tarapynan qoıylǵan din taqyrybyndaǵy suraqtarǵa jaýap berse, QMDB Ýaǵyz-nasıhat bóliminiń mamany Hamzat Ádilbekov tikeleı Efırde vıktorınalyq suraq joldaıdy. Sondaı-aq, «Qadir túnindegi qulshylyq», «Qadir túniniń duǵasy» beınerolıkteri kórsetiledi. Baǵdarlamalardyń oıdaǵydaı ótýin «Hıkmet» stýdııasynyń tilshisi Erkin Shákir qadaǵalaıdy.
Aıta keteıik, Qadir túni elimizdiń keıbir telearnalary men radıolary da habar arnaıdy. «Qazaqstan» Ulttyq telearnasy qasıetti túnde 22:00-den bastap tańsárige deıin tikeleı habar taratsa, Qazaq radiosy 18:10-nan bastap arnaıy shyǵarylym usynady.
