QMDB: Keńeıtilgen onlaın Tóralqa májilisinde 34 másele qaraldy (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń keńeıtilgen Tóralqa májilisi ótti.
Májiliske QMDB Ortalyq Apparat qyzmetkerleri men oblystyń bas ımamdary qatysty. Eki saǵatqa sozylǵan onlaın jınalysta 34 másele talqylandy. Atap aıtqanda, «Nur Múbárak» ýnıversıteti men medrese-kolledj shákirtterin dinı qyzmetke bólý, onlaın rejımge kóshken saýat ashý kýrstarynyń jumysyn jetildirý, múftııattyń 30 jyldyq mereıtoıy aıasynda eldimekenderde 30 kópir salý syndy qaıyrymdylyq sharalardy jalǵastyrý, ımamdardyń bilimin jetildirý maqsatynda onlaın kýrs uıymdastyrý, meshitterge at qoıýdy júıeleý, t.b. máseleler talqylandy.
«Qurmetti áriptester, ózderińiz bilesizder, qazir elimizde tótenshe jaǵdaı rejıminiń merzimi bitkenimen, karantın rejımi bitken joq. Juqpaly derttiń qaýpi seıilgen joq. Sondyqtan qyzmet barysynda sanıtarlyq talaptardy qatań saqtaýymyz tıis. Osy rette onlaın dáristerdi júıeli túrde jalǵastyrýdy tapsyramyn. Din salasyndaǵy qyzmetti aqsatyp almaı, jumysymyzdy onlaın rejımde júıeli túrde júrgize berýimiz kerek» dep atap ótti Bas múftı Naýryzbaı qajy Taǵanuly.
Májilis sońynda QMDB Tóraǵasy oblys bas ımamdary men Ortalyq apparat qyzmetkerlerine naqty tapsyrmalar berdi.
