QAZALYDA QARILAR DAIaRLAÝ ORTALYǴY EL IGILIGINE BERILDI (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qazaly aýdanynda Janqoja batyr atyndaǵy Qarılar daıarlaý ortalyǵynyń ashylý rásimine qatysty.
Bas múftı aýdan halqyn dinı oqý ordasynyń ashylýymen quttyqtap, izgi tilegin bildirdi.
«Ózderińizge málim, Qazaqstan musylmandary dinı basqarmasy jastarymyzdyń durys dinı bilim alýyna barynsha jaǵdaı jasap keledi. Búgin Qazalyda ashylǵan dinı oqý ǵımaraty jas býyn ókilderine durys bilim berýge qyzmet etedi. Alla Taǵala osy oqý ordasynan bolashaq ǵalymdar men qarılardyń shyǵýyn násip etkeı. Keshe ǵana Qyzylorda qalasynda Maral ıshan atyndaǵy medrese ashtyq. Búgin Qazaly aýdanynda Janqoja batyr atyndaǵy jańa dinı oqý ordasy el ıgiligine berilip otyr. Maqsatymyz – óskeleń urpaqqa tarıhı tulǵalarymyzdyń ónegeli ómirin úlgi etý, din men dástúr sabaqtastyǵyn dáripteý» dedi Naýryzbaı qajy Taǵanuly.
Qarılar ortalyǵynyń ashylý rásimine qatysqan Qazaly aýdanynyń ákimi Muhtar Orazbaev, zııaly qaýym ókilderi musylman qaýymyna izgi tilekterin jetkizdi.
Bas múftı saltanatty sharada Qarılar ortalyǵyn salýǵa úles qosqan azamattarǵa alǵys hatyn tabystady.
Aıta ketsek, jańa ǵımaratta bir mezette 100 shákirt tálim almaq. Ortalyqta dárishana, kitaphana, jataqhana, ashana bar. Jalpy aýmaǵy – 900 sharshy metr.
