Qasıetti Qadir túninde duǵamyz qabyl bolǵaı!
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qadirli jamaǵat!
Barshamyzdy qasıetti Ramazannyń, onyń ishinde myń aıdan qaıyrly Qadir túnine aman-esen jetkizgen Allaǵa sansyz shúkirler bolsyn!
Alla Taǵala jyldardyń ishinen ardaqty Paıǵambarymyz Muhammed (oǵan Allanyń salaýaty men sálemi bolsyn) dúnıege kelgen jyldy berekeli etip qoıdy. Aılardyń ishindegi Ramazan qasıetti aı. Kúnderdiń ishindegi juma, arapa kúnderiniń qasıeti erekshe. Al, Jaratqan Jabbar Iemiz túnderdiń ishinen Qadir keshiniń qadiri men qasıetin, dárejesi men saýabyn arttyryp qoıǵan.
Isi musylman balasynyń taǵdyr jazylatyn túndi taǵatsyzdana kútýiniń bir hıkmeti – Jaratqanǵa jaqyndaı túsýge talpynýy. Qadir keshiniń árbir sátin qulshylyqpen, duǵamen, Quran oqýmen, t.b. Allaǵa unamdy saýapty amaldarmen ótkizetinimiz sondyqtan.
Qadir túniniń negizgi qasıeti – adamzat balasyn eki dúnıe baqytyna jeteleıtin Quran Kárimniń túsýinde. Alla Taǵala bul týraly bylaı baıandaıdy: «Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady» («Qadir» súresi, 1-5-aıattar).
Paıǵambarymyz (oǵan Allanyń salaýaty men sálemi bolsyn) bir hadısinde: «Kimde-kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi», – degen.
Allanyń raqymy men meıirimi erekshe tógiletin túnde ýaqytymyzdy múmkindiginshe bos jibermeı, qulshylyqpen ótkizeıik. Óıtkeni, bul túnde Jaratqanǵa shynaıy jalbarynǵan pendelerdiń tilekteri qabyl etilip, taǵdyry jazylyp, rızyq-nesibesi bekitiledi. Keıbir ǵulamalar qasıetti Qadir keshinde kimderdiń qajylyqqa baratyny belgili bolady degen. Demek, ár adamǵa qatysty úkim shyǵarylatyn túndi barynsha saýapty amalǵa arnaǵanymyz abzal. Osy rette Qadir túninde jasaıtyn qaıyrly amaldarǵa toqtala keteıin. Eń bastysy musylman balasy bul keshti ımanmen, Allaǵa degen myqty senimmen, saýabyn úmit ete otyryp ótkizýi tıis. Namaz, Quran oqyp, duǵa jasap, Alladan keshirim surap, ardaqty Paıǵambarymyz Muhammedke (oǵan Allanyń salaýaty men sálemi bolsyn) salaýat aıtyp, ýaǵyz-nasıhat tyńdap ótkizýge asa mán berý kerek. Sonymen qatar, aldyn ala Qadir túniniń qasıeti týraly oqyp-bilip alǵan jón. Óıtkeni, bul keshtiń máni men mańyzyn, dárejesi men mártebesin, saýaby men qasıetin túsingen adam onyń bereketinen áste maqurym qalmaýǵa tyrysady.
Ardaqty aǵaıyn!
Bıylǵy Ramazannyń qasıetti Qadir keshi mamyr aıynyń 19-nan 20-na qaraǵan túnge sáıkes kelip otyr. 19 mamyrda meshitterimiz tańǵy saǵat 07:00 men keshki 20:00 aralyǵynda jumys isteıtin bolady. Osy rette barshańyzdy Qadir keshin óz úılerińizde ótkizýge shaqyramyn. Bıylǵy Ramazan aıy karantın jaǵdaıynda ótip jatqany ózderińizge belgili. Karantın talaptaryn oryndaýymyz tıis. Bul – siz ben bizdiń, óz otbasymyz ben eń jaqyn týystarymyzdyń densaýlyǵy men ómiriniń ıgiligi úshin qabyldanǵan sheshim. Muny túsinistikpen qabyldaısyzdar degen úmittemin.
Qazaqstan musylmandary dinı basqarmasy qasıetti Qadir keshinde Quran hatym duǵasyn, ýaǵyz-nasıhat pen paıdaly dáristerdi onlaın rejımde ótkizedi. Úıde otyryp, onlaın rejımde duǵaǵa qatysyp, nasıhat tyńdaýǵa tolyq múmkindik bar.
Osy rette barsha qaýymdy qasıetti Qadir túninde Túrkistan oblysyndaǵy tasqyn sýdan zardap shekken jerlesterimizge duǵa jasaýǵa úndeımin.
Jaratqan Jabbar Iemiz jer betinen juqpaly indetti joıyp, jaqsylyqta júzdesýdi násip etkeı.
Myń aıdan da qaıyrly Qadir túninde tilegen tilekterimiz ben qulshylyqtarymyzdy Alla Taǵala qabyl etkeı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
