Pavlodar saparynyń qorytyndysy: Keleli kezdesýlerdiń nátıjesi (FOTO)
Jýyrda Bas múftı Pavlodar oblysyna resmı saparmen bardy. QMDB Tóraǵasy Naýryzbaı qajy Taǵanulynyń Kereký óńirine jasaǵan sapary oblys ákimdiginen bastaldy. Bas múftı Pavlodar oblysynyń ákimi Ábilqaıyr Baqtybaıulymen kezdesip, óńirdegi dinı ahýaldy talqylady.
«Pavlodar oblysyndaǵy dinı ahýal meniń jiti nazarymda. Qazir bul óńirde 96 meshitimiz bar. 96 meshitte 132 din qyzmetkeri jumys isteıdi. Osy rette, birinshiden, din qyzmetkerleriniń aqparattyq-nasıhattyq jumystaryna ákimdik tarapynan qoldaý kórsetilse degen tilegim bar. Óıtkeni, halyqqa durys dinı aqparat taratý – barshaǵa ortaq is. Ekinshiden, ımam-moldalardyń dinı bilimi men tájirıbesin arttyrý baǵytyndaǵy sharalarymyzǵa da qoldaý kórsetilse ıgi is bolar edi. Bizdiń maqsatymyz ortaq: halyqtyń ıgiligi men birligi úshin qyzmet etý. Alla Taǵala ortaq maqsattaǵy jumysymyzǵa jar bolsyn» dedi Bas múftı.
Óz kezeginde oblys ákimi Ábilqaıyr Baqtybaıuly din qyzmetkerleriniń bilimin arttyrý, jastar arasynda dinı aǵartýshylyq sharalardy júrgizý, din men dástúr sabaqtastyǵyn nasıhattaý jumystarynda yntymaqtastyqty arttyrýǵa nıet bildirdi. Basqosýda kıeli óńirdiń tól perzenti, ǵulama Máshhúr Júsiptiń murasy men ónegeli ómirin óskeleń urpaqqa nasıhattaýdyń mańyzdylyǵy sóz boldy. Bas múftı men oblys ákimi osy baǵytta birlesken jobalardy júzege asyrýǵa ýaǵdalasty.
Osy kezdesýden keıin Bas múftı Pavlodar qalasy «Dostyq úıinde» ótken QMDB Ǵulamalar keńesiniń kóshpeli HHV májilisine tóraǵalyq etti. Keńes jumysyn ashqan Naýryzbaı qajy Taǵanuly: «Sanaýly merzim ishinde Ǵulamalar keńesi pármendi ınstıtýt retinde qalyptasty. Ózekti dinı máselede qoǵam arasynda «Ǵulamalar keńesiniń ustanymy qandaı? Qandaı pátýa shyǵarady eken?» degen saýaldar jıi aıtylady. Bul – siz ben bizdiń atqarǵan aýqymdy eńbegimiz ben janqııarlyqpen jasap jatqan jumystarymyzdyń jemisi. Elimizde tótenshe jaǵdaı jarııalanyp, halqymyz eleń-alań kúı keshken sátte bizdiń ǵulamalar onlaın rejımde mańyzdy qujattardy talqylap, qajetti pátýalar qabyldady. Bul pátýany jamaǵat durys qabyldap, bizdiń Úndeýge moıynsunyp, birligin kórsetti» dep atap ótti.
Keńestiń kezekti májilisinde «Júldeli jarystarǵa qatysty sharıǵat úkimi», «Musylman emes adamǵa keshirim surap, duǵa etý úkimi», «Import arqyly ákelingen et úkimi», «Áıeldiń mahramsyz qajylyqqa barý úkimi», «Meshittiń qubylasyna qatysty úkim», «Spırt qosylǵan taǵamdardyń, táttilerdiń úkimi», «Jyljymaıtyn múlikten zeket berý úkimi» syndy pátýalar qabyldandy.
Tústen keıin QMDB Tóraǵasy «Máshhúr Júsip» meshitinde qala, aýdan ımamdaryna dáris oqydy. Bas múftı bilim – ımannyń, kishipeıildiktiń, kórkem minezdiń, meıirimdiliktiń saýyty ekendigin tilge tıek etti. Sonymen qatar, eldi jaqsylyqqa shaqyratyn birden-bir ıslamdyq birlestik – Qazaqstan musylmandary dinı basqarmasy ekenin jetkizdi.
Alla Taǵala «Álı-Imran» súresiniń 110-aıatynda: «Sender eldi jaqsylyqqa shaqyryp, jamandyqtan tyıý úshin shyǵarylǵan qaıyrly úmbetsińder», – deıdi. Dinge qyzmet – Paıǵambar joly. Bul – uly mıssııa. «Biz, din qyzmetkerleri osy uly mıssııany jalǵastyrýshy tulǵalarmyz. Endigi maqsat, Paıǵambarymyz (oǵan Allanyń salaýaty men sálemi bolsyn) ósıet etkendeı, osy jumysymyzdy jaqsy kórip, dinge, elge qyzmet etýde tııanaqtylyq tanytý. Ár isimizdi kásibı túrde oryndaýǵa kiriseıik. Ortaq maqsat isinde jumyla jumys isteıik» dedi. Kezdesý sońy suraq-jaýapqa jalǵasyp, erkin suhbatqa ulasty. Júzdesýden keıin eldiń ıgiligi úshin duǵa jasaldy.
Qaıyrymdylyq – QMDB-nyń negizgi jumys baǵyttarynyń biri. Bas múftı bul baǵytqa qashan da mańyz berip, din qyzmetkerlerin adamnyń alǵysyn alyp, Allanyń razylyǵyna bólenýge úndep keledi. Naýryzbaı qajy Taǵanuly Kereký saparynyń ekinshi kúninde, ıaǵnı qasıetti jumada 100 otbasyǵa arnaıy syılyq úlestirdi. Sonymen qatar Baıanaýyl aýdany Maıqaıyń kentinde turatyn jalǵysbasty, kópbalaly ana Kásip Hınaıatqa eki bólmeli úıdiń kiltin tabystady.
«Adam balasy úshin baspananyń orny erekshe. Ol – sharshaǵanda tynyǵatyn, qulshylyq jasap, duǵa etetin, bala-shaǵańmen qaýyshyp, qýanyshqa bólenetin, qonaq kútip, batasyn alatyn mekeniń. Sondyqtan osy úıdi ıgilik jolynda paıdalanýlaryńyzǵa tilektespin. Osy otbasyǵa qoldaý bildirip, qýanyshyn eselegen barsha azamatqa Alla razy bolsyn aıtamyn. Jasaǵan qaıyrymdylyqtyń qaıyryn ózderińiz kórińizder» dedi.
Naýryzbaı qajy Taǵanuly óńirlerge jasaǵan saparynda kıeli mekenderge arnaıy baryp, asyl dinimizdi nasıhattaýǵa súbeli úles qosqan ǵulamalardyń kesenesin zııarat etip, Quran baǵyshtaıdy. Osy dástúrmen Bas múftı Baıanaýyl aýdanynda ornalasqan Máshhúr Júsip Kópeıulynyń kesenesin zııarat etti. Oıshyl, folklor tanýshy, Etnograf, tarıhshy, fılosof, qazaq mádenıeti men ádebıetiniń belgili tulǵasy, asyl dinimizdi nasıhattaýǵa ólsheýsiz úles qosqan Máshhúr Júsip ǵulamanyń rýhyna Quran baǵyshtap, duǵa jasady. Sondaı-aq ǵulamanyń murajaıyn aralap, ómiri men eńbegimen etene tanysty. Zııarat barysynda Naýryzbaı qajy Taǵanuly qurban shalyp, Jaratqannan jurtymyzdy juqpaly indetten saqtaýdy surady. Alla Taǵala el ıgiligi úshin jasalǵan duǵa-tilekterdi qabyl etkeı!
