«Pavlodar óńiri ıslam rýhanııatynyń tarıhy» kitabynyń tusaýkeseri ótti (FOTO)
Pavlodar oblystyq ortalyq «Máshhúr Júsip» meshitinde fılologııa ǵylymdarynyń kandıdaty, jýrnalıst Amantaı Toıshybaıulynyń «Pavlodar óńiri ıslam rýhanııatynyń tarıhy» kitabynyń tusaýkeseri ótti.
Sharaǵa oblystyń bas ımamy Joldas Qospaquly jáne ımamdar, ardagerler ókilderi, baspasóz ókilderi qatysty. Bas ımam Joldas Qospaquly jáne oblysymyzdyń qadirli aqsaqaldary Ýlıan Maqul, Kenje Keńesbaevtar atalmysh eńbek týraly tushymdy pikirler bildirdi.
Kitap «Ertis-Baıan óńirine Islam dininiń kelýi, ornyǵýy jáne patshalyq Reseı dáýirindegi Pavlodar óńirindegi Islam», «Keńes dáýirindegi Pavlodar óńirindegi Islam», «Táýelsizdik jyldaryndaǵy Pavlodar óńirindegi Islam» degen 3 bólimnen turady. Al kitap áýeli «Qazaq tarıhyndaǵy Islam» degen arnaıy bólimmen bastalady.
–Bul – buryn jazylmaǵan taqyryp, - dedi Amantaı Toıshybaı. – Jazylýy kerek dúnıe. Osy meshitte 10 jyldan beri qyzmet atqaryp kelemin. Sol 10 jylda jınalǵan derekterdiń basyn qosyp, bir jınaq etip shyǵardym. Jalpy, Ertis óńirinde Islamnyń qalyptasyp damýyna qojalardyń kelip, meshit, medrese salyp, shákirt tárbıeleýi negiz boldy. Onyń ústine halqymyz burynnan Islam dinin ustanǵan. Keńes dáýiri bastalar aldynda óńirimizde 40-qa jýyq meshit bolsa, keıin kóbin japty. Qazir oblysymyzda 100-den astam meshit bar.
Kitap avtory eńbektiń ólketaný baǵytynda jazylǵanyn atap ótti. Jınaqqa óńirdegi úlken din qaıratkerleri de engen.
–Kitap óńirdegi Islamnyń qalyptasýy men damýyna arnalǵan. Ólketaný quraly desek te bolady. Ishinde sharıǵat týraly dúnıe joq. «Ertistiń Pavlodar óńirindegi Islamnyń tarıhy» qujattar jınaǵy, gazetter men saıttardyń qory paıdalanyldy. Sondaı-aq ǵalymdardyń da eńbekterine kóz júgirttim, - deıdi A.Toıshybaıuly.
Kitaptyń redaktory, oblystyń bas ımamy Joldas Qospaquly:
–Buryn óńirimizdegi Islam rýhanııatyna qatysty mundaı kólemdi eńbek jaryq kórmegen. Túrli úzindi, maqala retinde qysqa derekter shyǵyp turdy. Bul – báriniń basy qosylyp, júıelengen, hronologııalyq turǵyda retke keltirilgen alǵashqy kitap. Bıyl Qazaqstan musylmandary dinı basqarmasynyń qurylǵanyna 30 jyl. Amantaı Toıshybaıulynyń kitaby osy mereıtoıǵa úlken syılyq bolyp otyr»,-dedi.
Aıta keteıik, jańa eńbekti dintaný jáne ólketaný sabaqtarynda qosymsha qural retinde paıdalanýǵa bolady. Oǵan qosa, bolashaq zertteýshilerdiń eńbegine negiz bolatyn jádiger. Kópshilik oqyrman kitapty «Máshhúr Júsip» meshitinen alýyna bolady.
