Pandemııa kezinde janaza jáne qudaıy as ótkizýge qatysty málimdemeni tanystyrdy

Elordada Prezıdent janyndaǵy Ortalyq kommýnıkatsııalar qyzmetinde tikeleı Efırde ótken brıfıngte QMDB Tóraǵasynyń orynbasary, naıb múftı Ershat Ońǵarov elimizdiń musylman qaýymyna Qazaqstan musylmandary dinı basqarmasynyń COVID-19 koronavırýsi kezinde janaza jáne qudaıy as ótkizýge qatysty málimdemesin tanystyrdy.

Janaza namazyna qatysty talaptar:

– Janaza namazyna bir ǵana dinı qyzmetkerdiń qatysýy;

– Janaza namazyna tek otbasy jáne jaqyn týmalarynyń qatysýy;

– Janazaǵa jalpy sany 30 kisiden artyq jınalmaý;

– Boıynda dene qyzýy nemese jóteli bar kisiniń janaza namazyna múlde qatyspaý;

– Janaza namazyna kelýshi kisi mindetti túrde sanıtarlyq normalardy (betperde taǵý, medıtsınalyq qolǵap kııý jáne eki metrden kem emes araqashyqtyq) saqtaý;

– Indetten qaıtys bolǵan máıitti dárigerdiń nusqaýlyǵyna saı jýý;

– Janaza namazy men ýaǵyzdyń jalpy ýaqytyn 5 mınýttan asyrmaý;

– Janaza namazy barysynda qol alysyp amandaspaý;

– Janaza namazynyń sabyn túzegende keminde eki metr qashyqtyqty saqtaý;

– Qabir basynda máıit jer qoınyna tapsyrylǵannan keıin jamaǵatty tezdetip qaıtarý;

– Jasy úlken kisiler, densaýlyǵy nashar adamdar (er men áıel) jáne jas balalar janaza namazdaryna qatyspaý;

– Qonaq asyn ótkizbeý;

– Janazadan keıingi asty ótkizbeýge nemese otbasy múshelerimen shektelý.

Qudaıy astarǵa (jetisi, qyrqy, júzi, jyly jáne taǵy basqa) qatysty talaptar:

– Astardy ótkizbeýge nemese otbasy músheleri, jaqyn týmalarymen shektelý;

– Bir ǵana dinı qyzmetkerdiń qatysýy;

– Sanıtarlyq normalardy (betperde taǵý, medıtsınalyq qolǵap kııý jáne araqashyqtyq) saqtaý.