NAÝRYZBAI QAJY TAǴANULY MAROKKO KOROLDIGINIŃ SYRTQY ISTER MINISTRIMEN KEZDESTI (FOTO)
QMDB Tóraǵasy, Bas múftı Naýryzbaı qajy Taǵanulynyń Marokko Koroldigindegi jumys sapary barysynda Syrtqy Ister mınıstri Nasyr Býrıtanyń ótinishi boıynsha kezdesý ótti.
Mınıstr eń aldymen QMDB delegatsııasyn jyly qabyldap, eki el arasyndaǵy qarym-qatynastardyń joǵary deńgeıge jetkenin atap ótti.
«Sizdiń Koroldikke kelýińiz bizdi qýantty. Biz Ortalyq Azııadaǵy Qazaqstanmen áriptestik baılanysymyzdy arttyra beremiz. Aramyzdy myńdaǵan shaqyrym bólgenimen bizderdi árıne din kóbirek baılanystyrady. Koroldiń bastamasy aıasynda qarym-qatynasymyzdy damyta bermekpiz. Sizdiń Marokkaǵa jasaǵan saparyńyz sátti boldy dep sanaımyn. Búgin Ózińiz eki eldiń yntymaqtastyǵyn jaqsartýǵa baǵyttalǵan memorandýmǵa qol qoıdyńyz. Sondyqtan osy baǵyttaǵy aýqymdy jumystarǵa kóbirek kóńil bólsek deımin. Saparda oryndalǵan yntymaqtastyq baǵytyndaǵy jumystaryńyzǵa Alla jar bolsyn» dedi mınıstr.
Óz kezeginde Bas múftı mınıstrge ystyq yqylasy úshin alǵys bildirip, yntymaqtastyq jolyndaǵy jumystaryna sáttilik tiledi.
«Sizdiń bizdiń el týraly aıtqan jyly lebizińizge raqmet. Bıyl dıplomatııalyq qatynastardyń ornaǵanyna 30 jyl toldy. 2016 jyldan beri Qazaqstanda Marokko Koroldiginiń Elshiligi jumys istep keledi. Biz barlyq Elshilermen onyń ishinde Marokko Koroldiginiń Elshisimen de tyǵyz baılanystamyz. Máýlit, Ramazan aılarynda kezdesip turamyz. 12 ǵasyrlyq tarıhy bar ataqty Ál-Qaraýın ýnıversıtetine zııarat jasadyq. Maqsatymyz Dinı basqarmamen Marokkodaǵy ıslamı baǵytta jumys isteıtin oryndarmen qarym-qatynas ornatyp, keleshekte úlken jobalar atqarý. Sizge jáne Marokko halqyna amandyq tileımin» dedi Bas múftı Naýryzbaı qajy Taǵanuly.
Aıta keteıik Marokkodaǵy sapar barysynda osy eldiń Ýaqyptar jáne Islam Isteri jónindegi mınıstrligi arasynda Islam yntymaqtastyǵy týraly memorandým jasalyp, naqty qadamdar iske asty.
