Naıb múftı halyqaralyq halal konferentsııaǵa qatysty (FOTO)
Almaty qalasynda Azyq-túlik qaýipsizdigi jónindegi Islam uıymy men Qazaq ulttyq agrarlyq zertteý ýnıversıtetiniń uıymdastyrýymen «Taǵam qaýipsizdigi jáne halal ónim» taqyrybynda halyqaralyq konferentsııa ótti.
Konferentsııaǵa QMDB Tóraǵasynyń orynbasary, naıb múftı Ershat Aǵybaıuly, «Halal Damý» dırektory Aıbek Asqarbekuly jáne álemniń 30 eliniń ókilderi qatysty.
«Azyq-túlik ónimderiniń sapasy men qaýipsizdigi máselesi – kúrdeli ári mańyzdy másele. Bul másele tek ǵalymdar, bıohımıkter, mıkrobıologtar tarapynan ǵana emes, sondaı-aq óndirýshiler, sanıtar-Epıdemıologııalyq qyzmetter, memlekettik organdar men tutynýshylar tarapynan da talap etiledi. Azyq-túlik ónimderiniń sapasy men qaýipsizdigin qamtamasyz etý máselesiniń ózektiligi jyl saıyn artýda, sebebi azyq-túlik ónimderi men óndiristik shıkizattardyń qaýipsizdigin qamtamasyz etý – halyq densaýlyǵyn saqtaýdyń negizgi faktorlarynyń biri. Halal – bul tamaq ónimderin óńdeý jáne saqtaý protsesterin, sonymen qatar, azyq-túlikti óńdeý, óndirý, daıyndaý, saqtaý, tasymaldaý jáne satý kezinde sapa men qaýipsizdigin baqylaýdyń negizgi sharalarynyń biri. Halal qaǵıdalary búkil álemdegi densaýlyq saqtaý organdary talap etetin azyq-túlik qaýipsizdigi sharalaryn tolyqtyrady jáne osylaısha olardyń álemdik naryqtardaǵy básekelestik deńgeıin arttyrady.
Halal standart – sharıǵat qaǵıdalary men zańdaryna negizdelgen, taǵam qaýipsizdigi men adaldyǵyn belgileıtin, álemdik standarttardy tolyqtyrýshy qujat. «Halal Damý» – Dinı basqarmaǵa qarasty birden-bir sertıfıkattaýshy organ. Sharıǵat pen halyqaralyq tájirıbe jáne memlekettiń 5 standartyna negizdelgen óziniń 6 standartyn qurastyrdy. Din janashyry, ult bolashaǵy men urpaq qaýipsizdigine alańdaýshylyq tanytatyn uıym retinde bizdiń de eń basty maqsatymyz – halyqqa qaýipsiz, tabıǵı, taza, eń bastysy, adal ónim usyný» degen Ershat Aǵybaıuly konferentsııa barysynda «Halal Damý» tájirıbesimen bólisip, halal ónim jáne taǵam qaýipsizdigine qatysty ózekti máselelerdi qozǵap, praktıkalyq sheshimderdi usyndy.
Konferentsııa sońynda, Azyq-túlik qaýipsizdigi jónindegi Islam uıymy dırektory Erlan Baıdáýlet Qazaqstan musylmandary dinı basqarmasyna, «Halal Damý» uıymynyń atqaryp jatqan qyzmeti el úshin, halyq úshin mańyzdy ári baǵaly ekendigin jetkizip, din janashyrlaryna alǵysyn bildirdi.
