Meshitterde kezekti qulshylyq júrgizý boıynsha

Qasıetti kitabymyz Quranda: «Rasynda, qıyndyqpen birge jeńildik bar. Alla senderge jeńildik qalaıdy», – delingen. Allaǵa shúkir, elimizde tótenshe jaǵdaı merzimi aıaqtalyp, halqymyz qalypty ómir tirshiligine aýysa bastady. Alaıda karantın rejıminiń talaptaryn áli de saqtap, saqtyq sharalaryna asa mán berýimiz qajet. 

Karantın rejıminiń jumsartylýyna baılanysty Qazaqstan musylmandary dinı basqarmasy da elimizdegi meshitterdiń jumystaryn jandandyryp keledi. Allaǵa shúkir, meshitterdegi qulshylyqtar jamaǵattyń qatysýymen ekinti namazynan keıin karantın kezindegi arnaıy sanıtarlyq talaptardy qatań saqtaı otyryp, júzege asatyn bolady

Bul rette Túrkistan oblysynyń bas memlekettik sanıtarlyq dárigeriniń oń sheshimine sáıkes búginnen bastap osy óńirdiń iri meshitterinde juma namazy oqylady. Biraq eń bastysy QR Sanıtarlyq Bas dárigeriniń 22.05.2020 jylǵy Qaýlysyndaǵy talaptardy oryndaı otyryp, meshitterdiń syıymdylyǵyn 30 paıyzdan asyrmaý qajet, sonymen qatar adamdar arasyndaǵy araqashyqtyq 1,5 metr bolýy tıis.

Qazirgi ýaqytta beleń alyp turǵan indettiń ár óńirlerde taralý deńgeıiniń ártúrliligine oraı aldaǵy ýaqytta ár óńir turǵyndarynyń densaýlyǵyna jaýap beretin jergilikti bas memlekettik sanıtarlyq dárigerdiń oń sheshimi negizinde juma namazy oqylady.   

Qulshylyq kezinde meshitterde júzege asatyn sanıtarlyq is-sharalar tártibi men erejelerdi basshylyqqa alýlaryńyzdy suraımyz.

Qurmetti baýyrlar!

Siz ben bizdiń elimizdegi vırýstyń aldyn alýǵa baǵyttalǵan keshendi sharalardy qatań saqtaýymyzdyń nátıjesi burynǵy qalypty qulshylyqtarymyzdy tez arada qaıta jasaýǵa múmkindik týǵyzatynyn  túsineıik. Ózimizge qamqorlyq – ózgelerge qamqorlyq ekenin esten shyǵarmaıyq.

Alla Taǵala jer betinen juqpaly indetti joıyp, meshitterimizdi jamaǵatqa toltyryp, berekeli, merekeli sátterde júzdesýdi jazǵaı! Elimiz aman, jerimiz tynysh, táýelsizdigimiz baıandy bolǵaı! Ámın!

Qazaqstan musylmandary dinı basqarmasy