Meshit ǵımaraty qujatyn Bas múftıge resmı túrde tabystady (FOTO)
Shyǵys Qazaqstan oblysy Ulan aýdany Qasym Qaısenov kentinde ornalasqan «Musa baba» meshit ǵımaraty qujatyn Qazaqstan musylmandary dinı basqarmasyna resmı tabystaý saltanatty jıyny ótti.
Qulshylyq úıin salǵan kásipker, din janashyry Qaırat Mýsın meshit ǵımaraty qujatyn Bas múftı Naýryzbaı qajy Taǵanulyna tabystady.
Qujatty qabyldap alǵan QMDB Tóraǵasy Naýryzbaı qajy Taǵanuly: «Kez kelgen musylmannyń rýhanı ómirinde meshittiń alar orny erekshe. Óıtkeni, adam ómirindegi mańyzdy qulshylyqtar men oqıǵalar meshitte ótedi. Qulshylyq úıine kelgen pende erekshe sezimge bólenip, júregi tynyshtyq tabady. Meshit salyp, jamaǵattyń alǵysy men duǵasyna kenelgen Qaırat Mýsın aǵamyzǵa Alla razy bolsyn. Bul meshittiń halyqtyń ıgiligi men birligine qyzmet etip, rýhanı ordanyń birine aınalýyn násip etkeı» dedi.
Igi is-shara barysynda Bas múftı Qazaqstan musylmandary dinı basqarmasynyń jýyrda ǵana shyǵarǵan «Ǵıbadat tutqasy» kitabyn syıǵa tartty.
