Májilis tóraǵasy Oraza aıt merekesimen quttyqtady

QR Parlament Májilisiniń Tóraǵasy Nurlan Nyǵmatýlın QMDB tóraǵasy, Bas múftı Naýryzbaı qajy Taǵanulyna Oraza aıt merekesimen quttyqtaý hatyn joldady.

«Barshańyzdy musylman qaýymynyń qasıetti de ulyq merekesi – Oraza aıtpen shyn júrekten quttyqtaımyn. «On eki aıdyń sultany» sanalatyn Ramazan aıynda jasaǵan qaıyrly amaldar qabyl bolsyn!

Oraza aıt merekesi – ol birligi men yntymaǵy jarasyp, bir shańyraqtyń astynda tatý-tátti ómir súrip jatqan barlyq qazaqstandyqtardyń berekesin arttyryp, eldigimizdi kúsheıtedi. Sonymen birge, bul adamdardyń bir-birine qaıyrymdylyq jasap, meıirimdilik kórsetetin erekshe mereke.

Osy qasıetti merekede denderińizge saýlyq, árbir otbasyna amandyq, qut-bereke tileımin! Elimiz aman, jurtymyz tynysh bolsyn» delingen quttyqtaý hatynda.