Mańǵystaýda eki otbasy baspanaly boldy (FOTO)
Oblystyq Beket ata, Jetibaı aýyldyq Súıinǵara meshitteriniń jáne Qazaqstan musylmandary dinı basqarmasynyń «Zeket» qory Mańǵystaý ókildiginiń uıymdastyrýymen Jetibaı kentinde eki otbasy baspanaly boldy.
Páter jaldap, turmystyń qıyndyǵyn kórip júrgen jas otbasylar endi qaıyrymdy halyq pen jomart jamaǵattyń qarajatyna alynǵan úsh bólmeli úıde turatyn bolady. Oblysymyzdyń bas ımamy Ánýar Eljanov bastaǵan aýdan, qala ımamdary, qoǵam belsendileri men jamaǵat ókilderi qos otbasyna aq tilekterin aıtsa, ortalyq meshittiń janyndaǵy áıel-qyzdar sektory jańa qonysqa kilem men kórpe-tósek syıǵa tartty.
Jańa qonys ıelerine úı kiltterin qoǵam belsendisi Aıat Súgirbaı men meshit janashyry Jamaladdın qajy Toqtasynov tapsyrdy.
–QMDB-nyń «Zeket» qorynyń bastamasymen elimizde «El úlesi – páterge» jobasynyń aıasynda birqatar muqtaj otbasylarǵa kómek berilip, turmystyq máselelerde qoldaý kórsetilýde. Igi sharanyń nátıjesinde, «Zeket» qory Mańǵystaý ókildiginiń uıymdastyrýymen eki jas otbasy qýanyshqa bólenip, baspanaly boldy. Qos otbasy respýblıka boıynsha 236, 237-shi kezekte úı aldy, - deıdi oblystyq Beket ata meshitiniń bas ımamy Ánýar Eljanov.
Qaıyrymdylyq sharasynyń nátıjesinde úıli bolǵan Albına Moldaǵalıeva – jalǵyzbasty ana. Joldasy jol apatynan qaıtys bolǵan soń, eki balamen úısiz, tabyssyz qalady. Qıyndyqqa betpe-bet kelgen jas ana tanystarynyń aıtýymen, «El úlesi-páterge» jobasyna keledi.
–Qatty qýanyp turmyn. Aqtaý qalasynda saraı jaldap turdym, jaǵdaıym máz emes edi. Joldasym qaıtys bolǵasyn, kishkentaı eki balammen dalada qalǵandaı boldym. Endi ózimniń jeke úıim bar. Oblystyq Beket ata meshitiniń ımamdaryna jáne jomart jandarǵa kóp alǵys! Allanyń nury jaýsyn! - deıdi Albına Moldaǵalıeva.
Al, úsh bólmeli úıdiń biri Jetibaı aýyldyq Súıinǵara meshitiniń ustazy Mádı Nuralyulyna buıyrdy. Allanyń úıinde Qurannan dáris beretin tálimger buǵan deıin úı jaldap júrgen eken. QMDB-nyń «Zeket» qorynyń Mańǵystaý ókildiginiń jetekshisi Izdibaı Qoblanovtyń aıtýynsha, 2019 jyldan beri «El úlesi –páterge» jobasynyń aıasynda óńirimizde 6 otbasy baspanaly bolǵan. Negizgi basymdyq tolyq emes otbasylar men din qyzmetkerlerine beriledi. Imamdar jyldyń aıaǵyna deıin keminde taǵy 4 otbasyny úıli etý úshin jumystanatyndyqtaryn jetkizdi.
