Hýsamýddın as-Syǵnaqıdyń «Tásdıd» kitaby oqyrmanǵa jol tartty (FOTO)

Qazaq jerinen shyqqan biregeı ǵalym Hýsamýddın as-Syǵnaqıdyń «Tásdıd» eńbeginiń tusaýy kesilip, qalyń oqyrmanǵa jol tartty.

Nur-Múbarak ýnıversıteti janyndaǵy Ábý Hanıfa ǵylymı-zertteý ortalyǵy bul eńbekti beker tańdamaǵan. Sebebi Matýrıdı senim mektebiniń beldi ókili Ábý Mýǵın Násáfıdiń «Támhıd» kitabyna jazylǵan túsindirmeniń qazaqsha aýdarmasy  570 betten turady. Iaǵnı senim, ıman máselesinde talas-tartysqa beıim qaýymǵa orta ǵasyrdyń ózinde naqty ǵylymı jaýap búgin de mańyzdy ári ózekti kúıinde. Kólemdi jumys ıslamtaný, dintaný baǵytyndaǵy magıstrant, doktoranttarǵa jáne jalpy aqıda máselelerin tereń úırenem deýshi oqyrman qaýymǵa arnalǵan.

Kitaptyń tusaýkeserine QMDB Tóraǵasy, Bas múftı Naýryzbaı qajy Taǵanuly onlaın qatysyp, arnaıy quttyqtady. Qazaq dalasynan shyqqan ǵulama babalardyń eńbegi qansha ýaqyt ótse de Islam áleminde mańyzdylyǵy artyp, búgingi urpaqqa erekshe amanat júktelgenine de toqtalyp, ǵalymdarǵa alǵysyn bildirdi.  

Professor, UǴA akademıgi Ábsattar qajy Derbisáli: «Hýsamýddın as-Syǵnaqı jaıly ǵylymı zertteýlerge den qoıǵan Nur-Múbarak ýnıversıtetiniń ǵalymdary, professor Shamshádın Kerim, al qazir jas ta bolsa bas bolyp júrgen prorektor Qaırat Qurmanbaev  PhD doktorlyǵyn da osy babamyzdyń eńbeginen qorǵady. Kitap jazý qanshalyqty qıyn, al ony jaryqqa shyǵarýdyń jaýapkershiligi odan da aýyr ekeni túsinikti.  Sondyqtan bul – úlken jumys», – dep joǵary baǵa berdi.

Tásdıdtiń qoljazba nusqasyn túrik zertteýshi ǵalymdary óńdep, arabsha mátinderin bergenimen, óz tiline aýdarmaǵan. «Bul kitap qazaq tilinde eń alǵash bolyp basylyp, jarııalanyp otyr» deıdi jas zertetýshi Syrym Shákızada.

Hýsamýddın as-Syǵnaqı HII-HIV ǵasyrlarda ómir súrgen Islam áleminiń biregeı ǵalymy. Ýsýl fıqh ilimine qatysty Bázdáýıdiń jáne Ahsıkasıdiń eńbegine jazǵan «Ýafı», «Káfı» túsindirmesi (sharhy), Marǵınanıdyń Hıdaıasyna jazǵan 6 tomdyq «Nıhaıa» kitaby, arab tiline baılanysty Zamahsharıdyń Mýfassalyna «Mýassal» dep sharh (túsindirme) jazǵanyn bile bermeımiz.

Osy oraıda as-Syǵnaqıdyń Syr óńirindegi urpaqtary qoldap, kitappen ǵana shektelmeı baba amanatyn jaryqqa shyǵarǵan Nur-Múbarak ýnıversıtetine rızalyqtaryn jaýdyryp, jańa aýdıtorııany da tolyq jasaqtap berdi. Iaǵnı tarıhı kitappen birge Hýsamýddın as-Syǵnaqı atyndaǵy jańa aýdıtorııanyń da tusaýy kesildi.

Ortaǵasyrlyq qazaq dalasynyń akademıginiń ómirbaıany, bilim joly órnektelgen jap-jaryq aýdıtorııa tarıh pen búgingi kúndi úndestirip turǵandaı sońǵy úlgidegi tehnologııalyq jabdyqtarmen jasaqtalyp, shákirtter endi tarıhı ortany sezine otyryp, SMART taqta arqyly kez-kelgen múmkindikterdi qoldana alady.

20 jyldyq mereıtoıǵa arnalǵan bul tartý Nur-Múbarak ýnıversıtetine ǵana emes, jalpy ǵylym, bilimsúıer qaýym, qazaq eline erekshe syı boldy.