«Halal oqytý ortalyǵynda» qasapshylarǵa arnalǵan semınar ótti (FOTO)
QMDB ǵımaratyndaǵy «Halal oqytý ortalyǵynda» Makınsk qus fabrıkasynyń qasapshylary men qasapshylyqqa jaýapty mamandarǵa arnalǵan oqý-semınary ótti.
Semınarda «Halal Damý» dırektory Aıbek Asqarbekuly, QMDB Sharıǵat jáne pátýa bóliminiń mamany Medet Qursaqov, «Halal Damý» veterınarlyq sanıtarııa isiniń mamany Danııar Safıev dáris oqydy.
«Qus ósirý búginde sharýashylyqtyń neǵurlym damyǵan salalarynyń birine aınaldy. Elimizde qus etin óndirý kólemi ulǵaıyp keledi. Alaıda sharıǵat jáne halal standart talaptaryna saı qus fabrıkalardyń sany az. Qazirgi tańda «Halal Damýdyń» baqylaýynda 20-dan astam qus fabrıkasy bar. Osy qus fabrıkalaryna qoıylatyn negizgi talap – qusty qolmen, sharıǵatqa saı baýyzdaý. Sol sebepti ár qasapshynyń halal týraly tolyq ári tereń maǵlumaty bolýy biz úshin mańyzdy.
Qazaq «taýyq soısa da qasapshy soısyn» degen. Bir qaraǵanda ońaı sekildi kóringen qasapshylyqtyń sharıǵatymyzda bekitilgen, halal standartymyzda naqtylanǵan ózindik talaptary men erekshelikteri bar. «Paıǵambarymyz (oǵan Allanyń salaýaty men sálemi bolsyn): «Alla Taǵala barlyq nárseni jaqsylap isteýdi buıyrdy. Sondyqtan mal soısańdar, durystap soıyńdar», – degen bolatyn» degen Aıbek Asqarbekuly halal standartqa saı mal baýyzdaý men et óńdeýdiń negizgi erekshelikterine toqtaldy.
Semınar barysynda Sharıǵat jáne pátýa bóliminiń mamany Medet Qursaqov qus kásibi men jem azyǵyna qoıylatyn sharıǵat talaptarǵa tereńirek toqtala otyryp, mal soıýdyń ádebi bar ekenin túsindirdi. Maldy Alla atymen baýyzdamaý jáne pyshaqpen emes, Elektr togymen qınap nemese basynan uryp óltirý onyń etin jaramsyz (haram) etetinin jetkizdi.
Veterınarııalyq sanıtarııa isiniń mamany Danııar Safıev halal standarty boıynsha qus azyǵynan bastap, baýyzdaý, óńdeý, saqtaý, tasymaldaý jáne satýǵa qoıylatyn barlyq kezeńderge jiti toqtalyp ótti.
Oqý baǵdarlamasy sońynda qatysýshylardyń suraqtaryna jaýap berildi. Óz kezeginde, dáriske qatysqan qasapshylar Dinı basqarma mamandaryna alǵys bildirdi.
