ELORDAMYZDYŃ EŃSESI BIIK BOLǴAI!
Qadirli qaýym! Qurmetti elorda turǵyndary!
Barshańyzdy elorda kúni merekesimen shyn júrekten quttyqtaımyn! Ár otbasyǵa baq pen bereke, izgilik pen ıgilik tileımin!
Allaǵa shúkir, sanaýly jyldar ishinde elordamyzdyń jańa kelbeti qalyptasyp, birlik pen beıbitshiliktiń sımvolyna aınaldy. Álemdik jáne dástúrli din kóshbasshylary bas qosatyn bas qalamyzda kúlli dúnıejúzin dostyq pen tatý ómir súrýge úndeıtin ózara kelisim qujattary qabyldanady. Búginde elordamyz álemdik din lıderleri pikir almasatyn, ortaq maqsattar men adamgershilik qundylyqtardy dáripteıtin ortalyqqa aınaldy.
Táýelsizdik jyldarynda jańa astanamyzda eń záýlim meshitter salyndy. Respýblıkalyq «Áziret Sultan» meshiti álemdegi eń kórikti ǵıbadathanalardyń qataryna endi. Tuńǵysh Prezıdent – Elbasy Nursultan Nazarbaevtyń bastamasymen elorda tórinde boı kóterip jatqan jańa qulshylyq úıi dúnıejúzindegi eń úlken ári sáýleti men sáni jarasqan aldyńǵy qatarly meshitterdiń biri bolmaq.
Energııa tutyný jaǵynan álemdegi biregeı nysan bolyp sanalatyn, erekshe zamanaýı stılde salynǵan «Allanyń gúli» meshit-kesheni de astanamyzda ornalasqan. Jańa úlgide boı kótergen meshitterimiz qulshylyqtyń ǵana emes, bilim men ǵylymnyń ordasyna, dinimiz ben dástúrimizdi dáripteıtin ári halyqqa qaıyrymdylyq kómek kórsetetin meıirimdiliktiń mekenine, izgilik pen birliktiń ortalyǵyna aınalýda.
Meshit qyzmetkerleri jamaǵatty ımandylyqqa uıytýmen qatar túrli sala boıynsha aıanbaı eńbek etip, elimiz ben jerimizdiń órkendeýine úles qosýǵa, táýelsiz Qazaqstannyń naǵyz patrıoty bolýǵa úndep keledi.
Qazaqstan musylmandary dinı basqarmasy Elbasynyń tarıhı kóshine ilesip, Almatydan arqa tósine qonys aýdaryp, memleket qamqorlyǵymen qurylysy bitken záýlim ǵımaratqa ornalasty. Búginde Qazaqstan musylmandary dinı basqarmasy aqparat jáne qoǵammen baılanys, ýaǵyz-nasıhat, qaıyrymdylyq, oqý-aǵartý jáne kadrlyq áleýet, rýhanı tárbıe – ıhsan ilimi, din men dástúr, jat dinı aǵymdarmen jumys syndy salalar boıynsha is-sharalarǵa basymdyq berip, ıgi jobalardy júıeli túrde júzege asyrýda.
Memleket basshysy Qasym-Jomart Kemeluly Dinı basqarmanyń el basyna kún týǵan syndarly sátterde qolǵa alǵan qaıyrymdylyq baǵyttaǵy jumysyn joǵary baǵalap, izgi nıetin bildirdi. Saıyp kelgende, elorda tórinen bastaý alǵan ıgi bastamalar barlyq oblys, aýdan, aýyldarda jalǵasyn tabýda.
Ardaqty aǵaıyn!
Prezıdentimiz Qasym-Jomart Toqaev aıtqandaı, elorda – elimizdiń júregi. Memleketimizdiń jarqyn bolashaǵyna jol ashatyn taǵdyrly sheshimder osy jerde qabyldanady.
Endeshe, el ıgiligi úshin qabyldanatyn taǵdyrly sheshimder halqymyzdyń baqytty ǵumyr keshýine oń áser etýin tileımiz. Alla Taǵala astanamyzdyń abyroıyn asqaq etip, jurtymyzǵa jaqsylyǵy men berekesin jaýdyrǵaı. Elimizdiń tuǵyry bıik, irgesi berik, halqymyzdyń júregi nurǵa, jany shýaqqa, ómirleri berekege toly, elordamyzdyń eńsesi bıik bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
