«El úlesi – páterge»: 231-shi baspananyń kilti tabystaldy (FOTO)

Qazaqstan musylmandary dinı basqarmasynyń 30 jyldyq mereıtoıyna oraı «El úlesi – páterge» jobasy aıasynda BQO, Terekti aýdanynyń Eńbek aýylynan birinshi top múgedegi Amanjan Esenjanovqa 231-shi baspananyń kilti tabystaldy.

Igilikti sharaǵa QMDB-nyń janyndaǵy «Zeket» qorynyń jetekshisi, BQO oblystyq ortalyq meshitiniń naıb ımamy Samat Álibaev, Terekti halqymen birge aýdan meshiti jáne «Birlik» qoǵamdyq birlestigi men jeke kásipkerlerdiń uıytqy bolýymen júzege asyryldy.

Páter kiltin tabystaýǵa Samat Qanatqalıuly arnaıy kelip, Bas múftı Naýryzbaı qajy Taǵanulynyń ystyq sálemin aıtyp, jańa qonysymen quttyqtaı otyryp, barsha qol ushyn sozǵan azamattarǵa alǵysyn bildirdi.

Baspanaly bolǵan Amanjan baýyrymyzdyń jańa qonysynda uıymdastyrýshylar men tilekshi qaýym dastarhannan dám tatyp, jyly lebizderin bildirdi.