El aǵalary Qadir keshimen quttyqtady (FOTO)
Qasıetti Qadir túninde Qazaqstan musylmandary dinı basqarmasynyń «Hıkmet» stýdııasy usynǵan onlaın baǵdarlamada Myrzataı Joldasbekov, Baqytjan Ertaev pen Ǵarıfolla Esim syndy qoǵam qaıratkerleri, el aǵalary merekelik lebizin bildirgen edi.
Memleket jáne qoǵam qaıratkeri, professor Myrzataı Joldasbekov:
«Bárińiz de úılerińizde tilek tilep otyrsyzdar. Bul tún – duǵalar qabyl bolatyn tún. Alladan elimizdiń amandyǵyn, jurtymyzdyń tynyshtyǵyn, balalarymyzdyń baqytyn tileımin» - dese, QR Parlamentiniń depýtaty Baqytjan Ertaev:
«Osy din bizdi talaı jaqsy jolǵa saldy. Alla Taǵala qoldasyn! Orazamyz qabyl bolsyn! Orazadan orazaǵa aman jetip, tórt kózimiz túgel kezdeseıik! Keń-baıtaq jerimiz tutas bolsyn, kópultty elimiz tatý bolsyn! Endi aldaǵy orazanyń Aıt merekesine aman-esen jeteıik!» - degen tilegin jetkizdi.
Al fılologııa ǵylymdarynyń doktory, professor Ǵarıfolla Esim:
«Elimiz aman, aspanymyz ashyq. Tek basymyzǵa kelgen bir indet bar. Ol da – Jaratýshynyń bir synaǵy dep bilemiz. Mine, osy synaq bizdi bir-birimizden alystatýdy emes, jaqyndatýdy buıyrsyn. Qadir túni – alysty jaqyndatatyn tún. Bul – yqylas pen yryzdyq túni. Bir-birimizge osy Qadir túninde jaqsy sózderimizdi aıtaıyq. Meıram qutty bolsyn! – dep, Qazaq elin myń aıdan da qaıyrly bolǵan Qadir keshimen quttyqtady.
Aıta keteıik, Qazaqstan musylmandary dinı basqarmasynyń «Hıkmet» stýdııasy Qasıetti Qadir túniniń qurmetine Dinı basqarmanyń youtube kanaly jáne Instagram-daǵy paraqshasy arqyly 00:30-dan 02:40-qa deıin «Myń aıdan da qaıyrly Qadir túni» atty onlaın baǵdarlamasyn usyndy.
