“Dala úni – dombyra”: respýblıkalyq festıvalda Áziret Sultan meshitiniń moldasy júldeli II oryndy ıelendi (FOTO)

Astana qalasynda “Dala úni – dombyra” atty 1-Respýblıkalyq rýhanı-mádenı festıval joǵary deńgeıde uıymdastyryldy. El kólemindegi oblystar men qalalardan arnaıy kelgen qatysýshylar ulttyq óner men rýhanııatty ushtastyrǵan bul sharada óz ónerlerin ortaǵa saldy.

Atalǵan festıvalǵa árbir óńirdegi meshitterden “Din men dástúr” baǵytyna jaýapty ımamdar men ustazdary boldy.Astana qalasy ókildiginen qatysqan Áziret Sultan meshitiniń moldasy Ádil Saqıuly óz talantymen kópshiliktiń kóńilinen shyǵyp, ekinshi oryndy ıelendi. Sonymen qatar, júldegerge qarjylaı syılyq tabystaldy.

Saltanatty sharada Qazaqstan Respýblıkasy Din isteri komıtetiniń tóraǵasy Ánýar Hatıev, Astana qalasynyń Din isteri jónindegi basqarma basshysy Qaırolla Dúıseshuly, sondaı-aq Áziret Sultan meshitiniń bas ımamy Erbolat Nuryldauly sóz sóılep, rýhanı mura men ulttyq dástúrdi ushtastyra bilgen bul sharanyń mańyzdylyǵyna toqtaldy. Olar qatysýshylardy quttyqtap, shyǵarmashylyq tabys tiledi.

Festıvalge qatysýshylardyń barlyǵy joǵary deńgeıde óner kórsetip, kórermenderdiń ystyq yqylasyna bólendi.

Áziret Sultan meshitiniń moldasy Ádil Saqıulynyń júldeli II oryn alýy – meshit ujymy men Astana qalasy ókildigi úshin úlken qýanysh ári mártebe.

Sýretter toptamasyn "FOTOGALEREIa" aıdarynan kóre alasyzdar!

Источник: Aisha