Búginnen bastap birqatar meshitter ashyldy

Búgin, 18 mamyrdan bastap QMDB-ǵa qarasty elimizdegi birqatar meshitter sanıtarlyq talaptardy saqtaı otyryp ashyldy.

Keıbir aımaqtaǵy meshitter karantın jaǵdaıyna, óńirdegi indet qaýpine baılanysty keıinirek ashylady. Ázirge eshbir meshitte jamaǵat namazy oqylmaıdy. Meshitter óńirlik ýaqyt ereksheligin eskere otyryp, tańǵy 07:00 men keshki 20:00 aralyǵynda jumys isteıdi. Turǵyndardyń qaýipsizdigi maqsatynda bul shart erteńgi Qadir túninde de saqtalady. Bul jaıynda QMDB Tóraǵasy Naýryzbaı qajy Taǵanuly Prezıdent janyndaǵy Ortalyq kommýnıkatsııalar qyzmetinde tikeleı Efırde ótken brıfıngte atap aıtqan bolatyn.

«Bıylǵy Ramazannyń qasıetti Qadir keshi mamyr aıynyń 19-ynan 20-syna qaraǵan túnge sáıkes kelip otyr. 19 mamyrda meshit tańǵy saǵat 7:00 men keshki 20:00 aralyǵynda jumys isteıdi. Osy rette barshańyzdy Qadir keshin óz úılerińizde ótkizýge shaqyramyn. Tártipke baǵynýdy suraımyz. Bul – siz ben bizdiń, óz otbasymyz ben eń jaqyn týystarymyzdyń densaýlyǵy men ómiriniń ıgiligi úshin qabyldanǵan shara», – dep atap ótti Bas múftı. 

Sondaı-aq meshitterdiń ashylýymen baılanysty karantın rejıminiń talaptaryn, saqtyq sharalaryn qatań saqtaý talap etiledi.

Meshitterde jeke namaz oqýǵa qoıylatyn talaptar: 

• Tek jekelegen túrde namaz oqýǵa ruqsat etiledi. Meshitterde jamaǵatpen (bes ýaqyt namaz, juma namazy, taraýyq namazy) namazdar oqylmaıdy;
• Meshitke jeke qulshylyqqa kelgen erler men áıelder uzaq ýaqyt meshitte bolmaýy tıis. Meshitte bolý ýaqyt uzaqtyǵy – 15 mınýt;
• Namaz oqýshylardyń araqashyqtyǵy 1,5 metr bolýy kerek jáne arnaıy belgilengen oryndarda namaz oqyp, namaz oqyp bolǵan soń meshitten birden shyǵyp ketýi tıis;
• Meshitke keletin adam sanyn dinı ǵımarattyń jalpy paıdaly aýdanynyń 30 paıyzynan artyq toltyrmaýy kerek;
• Meshitte qol alyspaý kerek;
• Meshitterde aýa almasý júıesi jaqsy júrý úshin barlyq esikterdi ashyp qoıý qajet;
• Ár 3 saǵat saıyn namaz oqıtyn zaldardy zalalsyzdandyrý jumystaryn júrgizý qajet;
• Namaz oqıtyn zaldarda ımamdar jáne namaz oqıtyn adamdar mindetti túrde betperde jáne medıtsınalyq qolǵappen júrýi kerek;
• Jasy úlken kisiler, densaýlyǵy nashar adamdar (er jáne áıel) jáne jas balalar namazdaryn úılerinde oqyǵany abzal;
• Meshit dárethanalaryn qoldaný barysynda araqashyqtyqty jáne santıtarlyq talaptardy saqtaýy tıis;
• Meshittiń kireberisinde turǵan antıseptıkalyq quraldardy paıdalaný qajet;
• Meshitke kirý bólek esikten jáne shyǵý bólek esikter arqyly bolýy tıis. 

Meshitte Quran oqytýǵa qatysty talaptar: 

• Quran oqytý bólmesine 10 adamnan artyq kirgizbeý;
• Quran oqytýǵa kelýshilerdiń aralarynda 1,5 metr qashyqtyqtyń saqtalýy jáne kelýshilerdiń arnaıy belgilengen oryndarǵa otyrýy;
• Quran oqıtyn bólmelerde ımamdar jáne kelýshilerdiń mindetti túrde betperdemen otyrýy;
• Gıgıenalyq talaptarǵa sáıkes bata jasaý (bet sıpaý jáne t.b.);
• Ár 3 saǵat saıyn Quran oqıtyn bólmeni jeldetip otyrýy;
• Quran oqıtyn bólmege kirmes buryn antıseptıkalyq quraldardy paıdalanýy;
• Quran oqıtyn bólmege kirý bólek esikten jáne shyǵý bólek esikter arqyly bolýy tıis.

Neke bólmelerindegi is-sharalarǵa qatysty talaptar: 

• Neke qııýǵa sharıǵat talaptaryna sáıkes, neke bólmesinde kýágerlerden basqa adamdar bolmaýy tıis;
• Neke qııýshylardyń aralary 1,5 metr qashyqtyqty saqtaý jáne arnaıy belgilengen oryndarǵa otyrý;
• Neke zaldarynda ımamdardyń jáne kelýshilerdiń betperde jáne medıtsınalyq qolǵappen bolý kerek;
• Neke qıyp bolǵan soń birden meshitten shyǵýy kerek;
• Neke qııý bólmesine kirýden aldyn antıseptıkalyq quraldardy paıdalaný qajet;
• Ár 3 saǵat saıyn neke zaldaryn zalalsyzdandyrý qajet.