Bıyl qazaqstandyqtar qajylyqqa bara almaıdy
Bul týraly Saýd Arabııasynyń Qajylyq jáne umra mınıstrligi habarlady. Álemdi sharpyǵan koronavırýs keseline baılanysty bıyl qajylyqqa kelýshiler kólemi aıtarlyqtaı shekteledi.
Koronavırýs indeti álemniń 180-nen astam eline taralyp, COVID-19 vırýsynan ajal qushqandar sany 1 mıllıonǵa jetti. Odan bólek 7 mıllıon adamnyń vırýs juqtyrǵany belgili boldy. Osyǵan oraı Saýd Arabııasynyń Densaýlyq saqtaý mınıstrligi pandemııadan týyndaǵan qaýip-qaterdiń aldyn alý jáne onyń taralýyna jol bermeý, sondaı-aq jahandyq densaýlyq saqtaý uıymdarynyń talaptaryn eskere otyryp bıylǵy qajylyq rásimine birqatar shekteý qoıdy.
«Saýd Arabııasy Koroldiginiń basty mindeti – musylman qajylarǵa qajylyq jáne umra rásimderin qaýipsiz oryndaýǵa árqashan múmkindik jasaý. Pandemııa bastalǵaly beri qajylardy qorǵaý úshin barlyq saqtyq sharalary qabyldanyp, qasıetti oryndarǵa syrttan kelýshiler shekteldi. Qasıetti jerlerde júrgen qajylardyń qaýipsizdigin qamtamasyz etý maqsatynda, Islam elderi men jáne halyqaralyq uıymdardyń talaptaryn eskere otyryp, shekteýlerdi ári qaraı kúsheıte tústik. Sebebi bizge saldary ólimge ákeletin qaýipti indettiń aldyn alý mańyzdy.
Koronavırýs ınfektsııasy adamdar kóbirek jınalatyn oryndarda, úlken jıyndarda taralatyny dáleldenip otyr. Sondyqtan da bıylǵy 1441 jyldyń (2020 jyl) qajylyq rásimi Saýd Arabııasynda turyp jatqan óte az kólemdegi adamdardyń qatysýymen ǵana ótetini jaıly sheshim qabyldandy. Bul sheshim qaýipti vırýstyń aldyn alý jáne qajylardyń densaýlyǵyn saqtaý maqsatynda jasalyp otyr» delingen Saýd Arabııasynyń Qajylyq jáne umra mınıstrligi málimdemesinde.
Aıta keteıik, búginde Saýd Arabııasy koronavırýs indetin juqtyrý deregi boıynsha arab elderi arasynda alǵashqy orynda tur. Bul elde 160 myńnan astam adamnyń qaýipti vırýs juqtyrǵany belgili boldy.
