BETTI TOLYQ JABÝǴA QATYSTY QMDB MÁLIMDEMESI

Qurmetti jamaǵat!

Búginde elimizde qoǵamdyq qaýipsizdikti qamtamasyz etý, azamattardyń quqyqtary men bostandyqtaryn qorǵaý maqsatynda birqatar zańnamalyq ózgerister engizilýde. Sonyń biri – bet-álpetin tolyq jabatyn kıimge (onyń biri nıqab) qoǵamdyq oryndarda tyıym salý týraly jańa shekteýler.

Bul sheshim qandaı da bir dinı senimdi nemese jeke tańdaýdy shekteý úshin emes, eń aldymen qoǵamdyq qaýipsizdikti qamtamasyz etý qajettiliginen týyndap otyr. Qazirgi tańda álemniń kóptegen elderi, onyń ishinde musylman elderi de qaýipsizdik maqsatynda osyndaı ustanymdy qabyldaýda.

Alla Taǵala qasıetti Quranda áıel kisilerdiń áýret jerine qatysty aıatta:

وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ

«Múmın áıelderge aıt: «(bógde erlerden) kózderin saqtasyn. Ári uıatty jerlerin qorǵasyn. Sondaı-aq zeınetterin kórsetpesin. Biraq olardyń ózdiginen kóringenderi (beti, qol-aıaqtary) budan tys jáne búrkenshikterin omyraýlaryna túsirsin. Zeınetterin kórsetpesin», – degen («Nur» súresi, 31-aıat).

Alla Elshisi (oǵan Allanyń salaýaty men sálemi bolsyn) óziniń hadısinde: «Ýa, Ásma! Balıǵat jasyna jetken qyzdyń (syrt kózge) myna ekeýinen basqa jeriniń kóringeni durys emes dep, beti men eki qolyn kórsetken» (ımam Ábý Dáýid).

Joǵaryda Quran aıattary men hadıste baıandalǵandaı áıel kisiler bet-júzin jabýǵa nemese búrkemeleýge mindettelmegen. Bul halqymyzdyń dástúrinde de kórinis tappaǵan.

Biz elimizdegi musylmandardyń birtutas dinı birlestigi retinde, qoǵamdaǵy turaqtylyq, yntymaq pen birlikti basty qundylyqtarymyzdyń biri dep baǵalaımyz. Islam dini de qoǵammen jarasymdy ómir súrýdi, tártipke baǵynyp, memlekettiń tynyshtyǵyna úles qosýdy nasıhattaıdy.

Sondyqtan da zańǵa túsinistikpen qarap, ortaq ıgilik jolynda birligimizdi bekemdeıik.

Alla Taǵala elimizge tynyshtyq, júregimizge ıman baılyǵyn násip etsin!

​