Bas múftı jańa meshittiń ashylýyna qatysty (FOTO)
Búgin QMDB Tóraǵasy, Bas múftı Naýryzbaı qajy Taǵanuly el Táýelsizdiginiń 30 jyldyq mereıtoıy aıasynda eski meshit janynan qaıta jańǵyrtyp salynǵan «Muhammed-Nur» qulshylyq úıiniń ashylý saltanatyna qatysty.
Saltanatty ashylý sharasy Shymkent ortalyq meshitiniń ustazy Meıirbek qarı Sársenbaevtyń qasıetti Quran oqýymen bastaldy. Quran batasy jasalyp, quttyqtaý sózin alǵan Bas múftı Naýryzbaı qajy Taǵanuly meshit salýdyń, qulshylyq etýdiń mańyzyna toqtaldy.
«Táýelsizdik – jalpy dúnıede teńdesi joq tátti sóz. Biraq onyń ońaılyqpen kelmegeni túsinikti. Kúni keshe 31 mamyr kúni qýǵyn-súrgin jáne asharshylyq qurbandaryn eske aldyq. «Tól shejiremizdegi qaıǵyly kezeńderdi ulttyq biregeıligimizden bóle-jara qaraý múmkin emes. Sondyqtan, biz saıası qýǵyn-súrgin jáne asharshylyq qurbandarynyń rýhyna taǵzym etip, esimderin máńgi este saqtaımyz. Tarıhtan taǵylym alyp, mundaı taýqymet eshqashan qaıtalanbaýy úshin bárin jasaıtyn bolamyz» dedi Memleket basshysy Qasym-Jomart Kemeluly. Táýelsizdiktiń arqasynda elimizde meshitter qaıta boı kóterip, dinimiz men dástúrimiz oraldy. Salt sanamyz qaıta jańǵyrdy. Meshit salýdyń dinimizde saýaby orasan. Qaltasynda qarjysy bar adam emes, Allanyń qalaýymen meshit salý buıyrady eken. Sondyqtan osynda meshit sala almadym degen oı mazalaǵan jandar bolsa, Alla Taǵala osyndaı meshit salýdyń saýabyn Sizderge de násip etsin. Muhammed-Nur esimi berilgen qasıetti oryn jamaǵaty kóp, jaqsylyǵy mol orynǵa aınalsyn» dedi Bas múftı.
Igi shara aıasynda Bas múftı Shymkent qalasy, Qarataý aýdany, Saıram turǵyn úı alabynda ornalasqan «Muhammed-Nur» meshitiniń ımamy, «Shymkent» medrese-kolledjiniń túlegi qarı Ábdiqadir Ýraımjanovqa qasıetti Quran Kárim kitabyn syılady. Keıin meshittiń qurylysyna qoldaý kórsetken barsha demeýshi azamattardyń atynan Shamqatjan Qalmuradov aqsaqalymyz sóz alyp, Bas múftıdiń qoldaý bildirgenine rızashlyǵyn jetkizdi.
Atalǵan is-sharaǵa Bas múftımen birge QMDB Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, QMDB-nyń «Zeket jáne qaıyrymdylyq» qorynyń dırektory Talǵat Omarov jáne Shymkent qalasynyń bas ımamy Baqdáýlet Abdrahmanov qatysty.
