Bas múftı Syr óńirinde jańa meshittiń ashylýyna qatysty (FOTO)
Syr óńirine jumys saparymen kelgen Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Qyzylorda oblysy, Jalaǵash aýdandyq «Imanqul ata» meshitiniń jańa ǵımaratynyń ashylý rásimine qatysty.
Saltanatty sharaǵa qatysqan QMDB Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, Qyzylorda oblysynyń bas ımamy Bolatbek Ulasqanuly, sondaı-aq Jalaǵash aýdany ákimi Asylbek Shámenov, memleket jáne qoǵam qaıratkeri Qojahmet Baımahanov, aýdandyq ardagerler keńesiniń tóraǵasy Sadyq Álıev meshittiń ashylýymen quttyqtap, jyly lebizderin bildirdi.
«Meshit – jamaǵatymen kórikti. Bul meshitke jamaǵat kelmese, jetim bolady. Sondyqtan jańa meshittiń ishi jamaǵatqa tolsyn. Bul – tálim men tárbıe ordasy. Babalarymyz meshit saldy, meshit ustady. Atalarymyz alǵashqy áripti Qurannan bastady. Keshegi Qunanbaı meshit saldyrdy, Abaı medresege bardy. Medresege barǵan Abaıdyń sanasy sónip, aqyly azaıǵan joq. Kerisinshe shyǵys pen batys mádenıetin qatar alyp júrdi. Shákárim, Ahmet, Mustafa syndy tulǵalarymyz da moldanyń aldynan ótken. Mine ıman turǵysynan, rýhanı jetilý turǵysynan meshitterimizdiń róli erekshe eken. Jer betiniń eń kórkem oryndary bolǵan meshitterimizge úles qosqan barsha baýyrlarymyzǵa Jaratqan Jannatta osyndaı záýlim úı násip qylsyn» dedi Bas múftı.
Budan keıin qonaqtar kórki kelisken jańa meshitte juma namazyn oqyp, el amandyǵy men jurt tynyshtyǵy úshin Alla Taǵaladan duǵa tiledi.
2018 jyly jergilikti kásipker Erlan Saǵymbaevtyń demeýshiligimen qurylysy bastalǵan jańa ǵımaratta 900 adam bir mezette qulshylyǵyn óteı alady. Erler jáne áıelder zalynan bólek quran oqıtyn, neke qııatyn jáne ımamdar bólmesi bar. Meshit janynan zamanaýı úlgidegi dárethana men 400 adamdyq ashana boı kótergen.
1908 jyly Imanqul Jalmaǵanbetulynyń bastamasymen salynǵan «Imanqul ata» meshitiniń 4 bólmeden turatyn eski ǵımaraty 150 adamǵa shaqtalǵan edi. Qazirgi tańda eski ǵımarat tarıhı muraǵa aınalǵan.
