Bas múftı qurban shalý rásimi qalaı ótetinin habarlady (FOTO)
Búgin Bas múftı Naýryzbaı qajy Taǵanuly Ortalyq Kommýnıkatsııalar qyzmetinde ótken brıfıngke qatysyp, bıylǵy Qurban aıttaǵy qurban shalýdyń ereksheligine toqtaldy.
QMDB Tóraǵasy brıfıngte búgin dúnıeden ótken Qazaqstan musylmandary dinı basqarmasynyń burynǵy bas múftıi, din qaıratkeri, akademık, kórnekti ǵalym Ábsattar qajy Derbisáliniń otbasyna kóńil aıtty.
Odan ári Naýryzbaı qajy Taǵanuly Qurban aıt merekesi bıyl elimizde 20-22 shilde aralyǵynda ótetinin habarlaı kele, qurbandyq shalý rásimi qatań sanıtarlyq-Epıdemıologııalyq talaptardy saqtaı otyryp, «qyzyl» aımaqta tek onlaın formatta, al «sary», «jasyl» aımaqtarda onlaın jáne oflaın formatta ótkiziletinin alǵa tartty.
«2021 jyly qurban shalý rásimin ótkizý eki jolmen júzege asyrylady. Birinshi joly – memlekettik sanıtarlyq-Epıdemıologııalyq qadaǵalaý organdary tarapynan ruqsat berilgen jergilikti qasaphanalarda sanıtarlyq erejelerdi qatań saqtaı otyryp «sary» jáne «jasyl» aımaqtarda onlaın jáne oflaın formatta ótkizý.
Ekinshi joly – elimizdiń «qyzyl» aımaqtarynda búgingi pandemııa jaǵdaıynda qurban shalýshyǵa qolaıly jaǵdaı jasaý jáne kómekke muqtaj jandardy qoldaý maqsatynda ótken jyldyń tájirıbesin qoldanyp, qurban shalý rásimin sharıǵattaǵy «ókildik» qaǵıdasyna sáıkes qurban2021.kz saıty arqyly tek onlaın rejımde júzege asyrý» dep atap ótti Bas múftı.
Brıfıng kezinde Bas múftı qurbandyq shalatyn arnaıy bekitilgen oryndar jáne muqtaj otbasylarǵa qurbandyq etin taratý jumysyn QMDB-nyń ókildikteri, meshit jamaǵaty men eriktiler júzege asyratynyn atap ótti.
