Bas múftı QMDB qyzmetkerlerimen onlaın rejımde jınalys ótkizdi (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Ortalyq apparat qyzmetkerlerimen onlaın rejımde jınalys ótkizdi. Jınalysqa naıb múftı Ershat Ońǵarov, QMDB bólim meńgerýshileri men mamandary qatysty.
Onlaın májiliste negizinen jeti másele qaraldy. Onyń alǵashqysy qazirgi indettiń órshýine baılanysty jumys erejesine ózgertý engizý, pandemııa talaptaryn qatań saqtaý qajettigi basa aıtyldy.
«Qazirgi ýaqyttyń talaby bireý-aq. Ol tazalyq pen ara qashyqtyqty saqtaý. Neǵurlym kópshilik oryndarǵa barmaý. Ǵımaratty barynsha taza ustap, dezınfektsııalyq jumystardy ýaqytynda júrgizý. Múmkindiginshe jumysty qashyqtan isteý. Bul indetke salǵyrt qaramaýymyz kerek. Salǵyrttyqtyń sońy ókinishke ulasyp jatyr. Sondyqtan el azamattaryn aıtylǵan tártipti qatań ustanyp júrýge shaqyramyn», - dedi QMDB Tóraǵasy Naýryzbaı qajy Taǵanuly.
Sonymen qatar tazalyqtan bólek qazirgi jaǵdaıdy eskere otyryp onlaın sadaqa berý tetigin qadaǵalaýdy tapsyrdy. Odan bólek onlaın jıynda Dinı bólim berý jáne kadr daıarlaý bóliminiń esebi tyńdaldy. Bólim meńgerýshisi Smaıyl Seıtbekov bıyl 9 medreseden 530 balanyń túlep ushqanyn jetkizdi. Sondaı-aq shákirtterdiń teń jartysynan astamy óńirlerde ımamdyq jáne ustazdyq qyzmetin bastaýǵa daıyn ekenin aıtty. Al Nur-Múbarak Egıpet Islam mádenıeti ýnıversıtetine qujat qabyldaý 8 shildege qaraı bastalady dedi Smaıyl Súıerqululy. Óz kezeginde Bas múftı aımaqtardaǵy dinı ahýaldy baqylap, bilim deńgeıin kóterýdi tapsyrdy.
Naýryzbaı qajy Taǵanuly osy jıynda onlaın dáristerdi qaıta jandandyryp, qaıyrymdylyq baǵyttaǵy jumystardy kóbeıtýdi shegelep aıtty. Odan bólek Qurban Aıt kezinde atqarylatyn sharalardy da bir pysyqtap ótti.
