Bas múftı Qaraǵandy oblysynyń ákimimen kezdesti (FOTO)
Qaraǵandy oblysyna eki kúndik resmı saparmen kelgen QMDB Tóraǵasy, Bas múftı Naýryzbaı qajy Taǵanuly búgin aımaq basshysy Jeńis Qasymbekpen kezdesti.
Kezdesýde eń aldymen oblystaǵy dinı ahýal sóz boldy.
«Jeńis Mahmuduly, shynaıy nıetińizge rahmet. Ózińiz kelgeli Qaraǵandy óńiri jalpy Saryarqa jerinde kóptegen sharýalar jasaldy. Memlekettik qyzmettiń bıiginde júrip alǵan tájirıbeńiz oblysqa aýadaı qajet ekeni ras. Qaraǵandy qalasynyń ózinde kóshe, aýdan ataýlaryn qazaqılandyrý, meshit ashýǵa járdemdesý jaǵyna mán berýińiz bizge úlken kómek. QMDB-nyń 30 jyldyq mereıtoıyna baılanysty rýhanı jańǵyrý turǵysynda uly tulǵalar Álıhan Bókeıhanov, Qazybek bı, Jaqyp Aqpaı, Qajybaı qajy esimderi birqatar meshitterge berildi. Aldaǵy ýaqytta qurylysy júrip jatqan qala meshitine Buqar jyraý esimin berý josparlanýda. Bul jaqsy úrdis» deı kele QMDB Tóraǵasy birneshe usynysyn jetkizdi. Onyń ishinde óńirde As berý, Zırat pen zııarat mádenıetin qalyptastyrý baǵytynda birlese jumys isteýge ýaǵdalasty.
Óz kezeginde oblys ákimi Jeńis Mahmuduly dinı basqarmanyń jumysyna tabys tilep, jergilikti oblys, aýdan, aýyl ımamdarynyna qoldaý kórsetý jaǵyn jalǵastyra beretinin jetkizdi. Sondaı-aq aımaq basshysy Dinı basqarmanyń ıgi bastamasyn qýana qabyldap, zıratqa qatysty sáýlet standarttaryn saqtaý qajettigine basa nazar aýdardy. Meshitter salýǵa qatysty sheshimin tappaı jatqan máselelerde qoldaý kórsetinin aıtyp, «As berý mádenıeti» qujatynyń, ásirese indet kezinde utymdy daıyndalǵanyn tilge tıek etti.
Kezdesý sońynda Bas múftı jaqynda ǵana «Muftiyat» baspasynan shyqqan «Tápsirlerdiń tańdaýlysy» kitabyn syıǵa tartty.
Aıta keteıik, búgingi kezdesýge oblys bas ımamy Ómirzaq Qazkenuly, Ýaǵyz-nasıhat bóliminiń meńgerýshisi Batyrjan Mansurov qatysty.
