Bas múftı qala basshysymen Jańaózenniń dinı ahýalyn talqylady (FOTO)

Mańǵystaý oblysyna resmı saparmen barǵan Bas múftı Naýryzbaı qajy Taǵanuly Jańaózen qalasynyń ákimi Maqsat Ońǵarbaıulymen kezdesip, dinı ahýaldy talqylady.

Resmı kezdesýge QMDB tarapynan Apparat basshysy Ǵylymbek Jádigeruly, Ýaǵyz-nasıhat bóliminiń meńgerýshisi Batyrjan Berdenuly, Aqparat jáne qoǵammen baılanys bóliminiń meńgerýshisi Marat Dálelhanuly, Mańǵystaý oblysynyń Bas ımamy Ánýar Izimbaıuly qatysty.

Basqosýda Bas múftı men qala basshysy jastarǵa dinı ońaltý jumystaryn júıeli júrgizýdiń mańyzyn talqylady.

«Qazaqstan musylmandary dinı basqarmasy óziniń dinı qyzmetinde 4 baǵytqa basymdyq beredi. Sonyń biri – jastardy jat aǵymnyń arbaýynan saqtap, olarǵa dinı ońaltý jumystaryn júrgizý. Jasyratyny joq, keıde osy óńirdegi keıbir jekelegen azamattar múftııat pátýasyna qaıshy amaldarǵa baryp qoıady. Osy óńirge QMDB Ǵulamalar keńesiniń birneshe ǵalymyn ákelip, túsindirý jumystaryna kirisip kettik. Ózim de jekeleı kezdesýlerge qatysyp, múftııat ustanymy men memleket talabyn túsindirdim. Osynaý sharalarǵa ákimdik tarapynan da tıisti qoldaý qajet», – dedi Bas múftı Naýryzbaı qajy Taǵanuly.

Óz kezeginde qala basshysy Maqsat Ońǵarbaıuly ortaq iske ákimdik tarapynan qoldaý kórsetile beretinin jetkizdi.

Kezdesý sońynda taraptar ózara kelisim men yntymaqtastyqqa qol jetkizdi.