Bas múftı Pavlodar oblysynyń ákimimen óńirdegi dinı ahýaldy talqylady (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Pavlodar oblysynyń ákimi Ábilqaıyr Baqtybaıulymen kezdesti.

Resmı kezdesýge QMDB tarapynan Apparat basshysy Ǵylymbek Jádigeruly, QMDB Ýaǵyz-nasıhat bóliminiń meńgerýshisi Batyrjan Berdenuly, Pavlodar oblysynyń bas ımamy Joldas Qospaquly qatysty.

Aımaq basshysy Kereký óńirine kelgen Bas múftı bastaǵan delegatsııa jumysyna tabys tiledi.

«Pavlodar oblysyndaǵy dinı ahýal meniń jiti nazarymda. Qazir bul óńirde 96 meshitimiz bar. 96 meshitte 132 din qyzmetkeri jumys isteıdi. Osy rette, birinshiden, din qyzmetkerleriniń aqparattyq-nasıhattyq jumystaryna ákimdik tarapynan qoldaý kórsetilse degen tilegim bar. Óıtkeni, halyqqa durys dinı aqparat taratý – barshaǵa ortaq is. Ekinshiden, ımam-moldalardyń dinı bilimi men tájirıbesin arttyrý baǵytyndaǵy sharalarymyzǵa da qoldaý kórsetilse ıgi is bolar edi.  Bizdiń maqsatymyz ortaq: halyqtyń ıgiligi men birligi úshin qyzmet etý. Alla Taǵala ortaq maqsattaǵy jumysymyzǵa jar bolsyn», - dedi Bas múftı Naýryzbaı qajy Taǵanuly.

Kezdesýde oblys ákimi Ábilqaıyr Baqtybaıuly din qyzmetkerleriniń bilimin arttyrý, jastar arasynda dinı aǵartýshylyq sharalardy júrgizý, din men dástúr sabaqtastyǵyn nasıhattaý jumystarynda yntymaqtastyqty arttyrýǵa nıet bildirdi.

Basqosýda kıeli óńirdiń tól perzenti, ǵulama Máshhúr Júsiptiń murasy men ónegeli ómirin óskeleń urpaqqa nasıhattaýdyń mańyzdylyǵy sóz boldy. Bas múftı men oblys ákimi osy baǵytta birlesken jobalardy júzege asyrýǵa ýaǵdalasty.