Bas múftı Mysyrda ótip jatqan halyqaralyq konferentsııada baıandama jasady (FOTO)
Búgin QMDB Tóraǵasy, Bas múftı Naýryzbaı qajy Taǵanuly Mysyr Arab Respýblıkasynyń múftıi Shaýqı Ibrahım Allamnyń shaqyrýymen Kaır qalasyna keldi. Munda Mysyr memleketiniń uıymdastyrýymen eki kúnge jalǵasatyn «Dinı Ekstremızm: ıdeologııalyq alǵysharttary men qarsy turýdyń strategııalary» atty halyqaralyq konferentsııa ótip jatyr.
Jıyndy ashqan Mysyr múftıi jahandyq ózgerister, Ekstremızm qaýpi, Islam dininiń qundylyǵy men tazalyǵy týrasynda aıtyp ótti. Alqaly jıynǵa arnaıy kelgen QMDB Tóraǵasy elimizdegi dástúrli qundylyqqa toqtalyp, jat aǵymmen kúres, Ekstremızmge qarsy jobalardy tilge tıek etti.
«Qazaqstan – táýelsizdik alǵan tustan beri jat aǵymmen, psevdoıslamdyq kózqarastarmen kúresip keledi. Búgingi tańda syrttan keletin túrli ózge dinı aǵymdarmen kúres jospary jasalǵan. Bul rette Qazaqstan musylmandary dinı basqarmasy aýqymdy jumystardy atqaryp keledi. Qazaqstan – ǵasyrlar boıy Matýrıdı senim mektebi men Hanafı mazhabyn ustanyp keledi. Orta Azııa elderi sekildi biz de salt-dástúrimizdi qurmettep, sonyń aıasynda ómir súrýdemiz. Bul birinshi kezekte babalar jolyn ustaný, ótkenge qurmet. Elimizdegi dinı tutastyqty saqtaý, ıslam atyn jamylǵan astyrtyn toptarmen kúres toqtamaıdy.
Búginde álemdegi geosaıası jaǵdaı ózgerip, kóptegen elderge qaýip tónip turǵanda bul turǵyda birigip qımyldaý arqyly ǵana aldyn alamyz. Osy maqsatta álem elderiniń basyn qosyp, turaqtylyqqa shaqyryp otyrǵan konferentsııanyń túpki ıdeıasyn qoldaımyz. Memlekettiń, ondaǵy san myńdaǵan adamdardyń ómiri basty nazarda bolýy tıis. Oǵan tóndiretin qaýip, syrttan keletin basqa da kúshterge jol bermeýge tıispiz», – dedi óz sózinde Bas múftı.
Aıta keteıik, halyqaralyq konferentsııaǵa Orta Azııa, Arab memleketteri, Shyǵys Azııa elderinen júzdegen delegat qatysýda. Jıynda ál-Azhar ýákili Muhammed ad-Dýını, Mysyr Arab respýblıkasynyń Ýaqyp mınıstri Muhammed Muhtar Juma arnaıy baıandama jasady.
