Bas múftı mańǵystaýlyq ımamdarǵa dáris oqydy (FOTO)
Búgin Mańǵystaý oblysyna saparmen barǵan Qazaqstan musylmandary dinı basqarmasynyń tóraǵasy Naýryzbaı qajy Taǵanuly Aqtaý qalasynda ımamdarǵa dáris oqyp, dinı salada jınaqtaǵan tájirıbesimen bólisti.
«Zııatker ımam kelbeti» taqyrybynda órbigen dáriste Bas múftı din qyzmetkeriniń jaýapkershiligine toqtaldy.
«Imamnyń ár sáti – jaýapkershilik. Óıtkeni biz Allanyń amanatyn arqalap júrgen janbyz. Halyqty ımandylyqqa úndeıtin ımamnyń boıynda izgilik qundylyqtary únemi kórinis taýyp otyrýy tıis. Barlyq iste birlik kerek. Barshańyz óz aralaryńyzdaǵy basshyǵa baǵynyp, bir úıdiń balasyndaı birlesip, uıymdasyp dinge, halyqqa qyzmet etýde yjdahat tanytyp, belsendi bolyńyzdar. Halyqqa qyzmet etýden asqan ǵazız nárse joq. Adamnyń alǵysyn alǵan pende Allanyń da rızalyǵyna bólenedi. Barshańyzdy jurtqa jaqsylyq jasaýda ózara jarysýǵa shaqyramyn», - dedi Naýryzbaı qajy Taǵanuly.
Sonymen qatar, Bas múftı óz dárisinde din qyzmetkerlerin áleýmettik jeliniń áleýeti men ıgiligin tıimdi paıdalanýǵa úndedi. Kezdesý sońynda QMDB Tóraǵasy mańǵystaýlyq ımamdarǵa naqty tapsyrmalar berdi.
