Bas múftı Kaırdegi ál-Hýseın meshitine zııarat jasady (FOTO)
QMDB Tóraǵasy, Bas múftı Naýryzbaı qajy Taǵanuly Kaırdegi eń ejelgi meshittiń biri ál-Hýseın meshitine baryp zııarat jasady.
Ýaqyp mınıstri Muhammed Muhtar Juma kóne qulshylyq ordasyn kórsetip, tarıhymen tolyq tanystyrdy. Han ál-Halılı bazarynyń mańynda ornalasqan 1154 jyly salynǵan. Álemdegi Islam meshitteriniń ishindegi eń ásem meshitte eki munara bar. Munda kóptegen kıeli zattar saqtalǵan. Sondaı-aq altynmen jáne Shyǵys áshekeılerimen bezendirilgen. Meshitte Paıǵambarymyzdyń (oǵan Allanyń salaýaty men sálemi bolsyn) nemeresi ál-Hýseınniń súıegi jerlengen.
Ýaqyp mınıstri meshit ishindegi tarıhı jádigerlerdi tolyq tanystyrdy. Atap aıtqanda, Alla elshisiniń (oǵan Allanyń salaýaty men sálemi bolsyn) jeıdesi, ustaǵan qylyshy men saqaly saqtalǵan. Birneshe ǵasyr ótse de bul dúnıeler shirimeı, buzylmaı sol kúıinde jetip otyr.
Aıta keteıik, qulshylyq ordasynda budan bólek kóne Qurannyń qoljazbalary da saqtaýly. Bas múftı Hýseın (Alla oǵan razy bolsyn) qabirin zııarat etip, duǵa baǵyshtady.
