Bas múftı destrýktıvti dinı aǵymda bolǵan azamattarmen kezdesti (FOTO)
QMDB Tóraǵasy, Bas múftı Naýryzbaı qajy Taǵanulynyń bastamasymen «Shyndyqty izdegen tabady» atty taqyryp aıasynda elordada arnaıy kezdesý ótti.
Dinı ońaltý bóliminiń uıymdastyrýymen ótken jıynǵa buryn destrýktıvti dinı aǵymdar jeteginde bolyp, keıin dástúrli Ábý Hanıfa mázhabyna bet burǵan, sondaı-aq «Jýsan» operatsııasymen elge oralǵan azamattar qatysty.
Jıyn barysynda Bas múftı Naýryzbaı qajy Taǵanuly elimizdegi dástúrli Ábý Hanıfa mázhabynyń tarıhı sabaqtastyǵy men mańyzdylyǵyna toqtalyp, tól mázhabymyzdyń qoǵamnyń ilgeri damýyna tıgizer orasan paıdasy týraly nasıhatyn jetkizdi.
Buryn destrýktıvti aǵymnyń arbaýyna ilikken azamattar búginde ózderiniń qateligin túsinip, dástúrli Ábý Hanıfa mázhaby, Matýrıdı aqıdasy boıynsha dinı bilimin jetildirip jatqanyn tilge tıek etti.
Olar Qazaqstan musylmandary dinı basqarmasynyń dinı ońaltý salasy boıynsha aqparattyq túsindirme jumystaryna atsalysyp, qatelikten sabaq alýdyń paıdalary týraly pikirin bólisti.
Aıta ketsek, ótken jyly Bas múftı Naýryzbaı qajy Taǵanuly QMDB janynan Dinı ońaltý bólimin ashqan bolatyn. Búginde bólim mamandary radıkaldy dinı kózqarastaǵy azamattarǵa jeke túsindirme jumystaryn júıeli túrde júrgizýde.
