BAS MÚFTI ÁLEMDIK PÁTÝA KEŃESINIŃ II OTYRYSYNA QATYSTY
Búgin Mysyr Arab Respýblıkasynyń Kaır qalasynda Álemdegi pátýa shyǵaratyn mekemeler men organdardyń Bas hatshylyǵy Atqarýshy keńesiniń II otyrysy ótti.
Atalǵan jıynǵa keńestiń turaqty múshesi retinde Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly qatysyp, halyqaralyq deńgeıde pátýa salasyndaǵy ózekti máseleler talqylandy.
Jıynǵa sondaı-aq Atqarýshy keńestiń ózge de músheleri – Oman Sultandyǵy Pátýa keńsesiniń Bas hatshysy Ahmad bın Hamad ál-Sııabı, Chad Respýblıkasynyń Bas múftıi Ahmad an-Nýr Muhammed ál-Hılý, Musylman qaýymdary dúnıejúzilik keńesiniń Bas hatshysy Muhammed ál-Bısharı, sondaı-aq Álemdegi pátýa mekemeleri men organdary Bas hatshylyǵynyń Bas hatshysy Ibrahım Ibrahım Mahmýd Najm qatysty.
Otyrysty Mysyr Arab Respýblıkasynyń Bas múftıi, Álemdegi pátýa mekemeleri men organdary Bas hatshylyǵy Joǵary keńesiniń tóraǵasy, professor Nazır Muhammed Aıad júrgizdi. Jıyn barysynda Bas hatshylyqtyń ótken kezeńdegi qyzmeti saralanyp, aldaǵy jumys josparlary, sondaı-aq pátýa qyzmetin zamanaýı talaptarǵa saı tsıfrlyq keńistiktegi pátýa berý máselelerin damytý qaraldy.
Aıta keteıik, atalǵan Atqarýshy keńes otyrysy pátýa ınstıtýttarynyń ózara yntymaqtastyǵyn nyǵaıtýǵa, tájirıbe almasýǵa jáne dinı-quqyqtyq máselelerdi birlesip zerdeleýge baǵyttalǵan mańyzdy halyqaralyq alań bolyp sanalady.
