Bas múftı 8 din qyzmetkerin jańa qonysymen quttyqtady (FOTO)

QMDB Tóraǵasy Naýryzbaı qajy Taǵanuly Mańǵystaý oblysy Munaıly aýdanyndaǵy "Mıǵraj" meshiti aýlasynda salynǵan turǵyn úıdiń ashylý saltanatyna qatysyp, baspanaly bolǵan 8 din qyzmetkerin jańa qonysymen quttyqtady.

«Adam balasy úshin baspananyń orny erekshe. Úı – sharshaǵanda tynyǵatyn, qulshylyq jasap, duǵa etetin, bala-shaǵańmen qaýyshyp, qýanyshqa bólenetin, qonaq kútip, batasyn alatyn mekeniń. Sondyqtan osy úıdi ıgilikke paıdalanyp, Alla jolynda aıanbaı qyzmet etińizder. Imamdarǵa qoldaý bildirip, qýanyshyn eselegen barsha azamatqa Alla razy bolsyn aıtamyn. Jasaǵan qaıyrymdylyqtyń qaıyryn ózderińiz kórińizder. Jańa qonystaryńyz qutty bolsyn», - dedi Naýryzbaı qajy Taǵanuly.

Bas múftı baspanaly bolǵan din qyzmetkerleriniń otbasyna arnaıy duǵa jasady.

Aıta ketsek, meshit qyzmetkerlerine arnalǵan tórt qabatty turǵyn úı jeke kásipkerler men janashyr azamattardyń qarjysyna salynǵan. Turǵyn úı 8 otbasyǵa arnalǵan. Barlyq talapqa saı jabdyqtalǵan. Ár páterdiń kólemi – 54 sharshy metr.