ASTANADAǴY «QARAÓTKEL» ZIRATYNDA AQTAMAQ QALPE QULPYTASY ORNATYLADY (FOTO)

Elordadaǵy Kenesary hannyń 200 áskeri men Alash ardaqtysy Álıhan Bókeıhanulynyń kúıeýbalasy Smaǵul Sádýaqasov syndy tulǵalar jerlengen «Qaraótkel» zıratynda tarıhı din qaıratkeri Aqtamaq qalpege arnalǵan qulpytas ornatylady.

Astana qalasynyń bas ımamy Erbolat Júsip bastaǵan elorda ımamdary pen fılologııa ǵylymdarynyń doktory, ádebıet tarıhshysy, alashtanýshy Dıhan Qamzabekuly búgin zıratqa baryp, din qaıratkeri Aqtamaq qalpeniń jerlengen ornyn kórip qaıtty.  

Aqtamaq qalpe — qazaq halqynyń dinı-rýhanı tarıhynda erekshe oryn alatyn tulǵa. Ol 37 jasynda obadan qaıtys bolyp, Aqmola musylmandary zıratyna jerlengen. Bul týraly kórnekti dintanýshy Sádýaqas Ǵylmanı men ólketanýshy Meıram Sársetulynyń eńbekterinde aıtylady. Onyń 500-ge jýyq bilikti molda daıarlaǵany jáne dinı bilim berý isine qosqan úlesi onyń qazaq ıslam tarıhyndaǵy mańyzdy tulǵa ekenin kórsetedi.

Al, «Qalpe» ataǵy — ıslam dinindegi qurmetti laýazymdardyń biri. Bul ataq sopylyq ilim men ıslam mádenıetiniń qazaq qoǵamyna beıimdelýine baılanysty qalyptasqan. Qalpe ataǵy kóbinese belgili bir sopylyq mektepke (tarıqatqa) tıesili dinı jetekshiler men shákirtterge berilgen. S. Ǵylmanıdiń da «Sáken qalpe» atymen tanylǵany málim.

Источник: Aidos