Ábsattar qajy Derbisáli atyndaǵy aýdıtorııa ashyldy (FOTO)
Nur-Múbarak ýnıversıtetinde QMDB Tóraǵasy, Bas múftı qyzmetin atqarǵan shyǵystanýshy, fılologııa ǵylymdarynyń doktory, professor, UǴA akademıgi Ábsattar qajy Derbisáli atyndaǵy aýdıtorııa ashyldy.
Saltanatty sharada ýnıversıtet basshylyǵy Ábsattar qajy Derbisáliniń elimizdegi bilim-ǵylym, din salasynda ǵana emes, Nur-Múbarak ýnıversıtetiniń tarıhynda ózindik qoltańbasy baryna erekshe toqtaldy. Ýnıversıtet ujymynyń ynta-yqylasyna rızalyǵyn bildirgen Ábsattar qajy Derbisáli osydan 20 jyl burynǵy ahýalǵa sheginis jasap, tarıhı bastamany joǵary deńgeıde alyp ketken ýnıversıtet basshylyǵyna, ujymyna rızalyǵyn bildirip, alǵysyn jaýdyrdy.
Rektor, professor Mýhammad ásh-Shahhat ál-Jındı ýnıversıtettiń Dıssertatsııalyq keńes tóraǵasy Ábsattar qajy Derbisáliniń qazaq eli úshin ǵana emes, Islam álemine qosqan úlesine toqtalyp, shákirtterdiń akademıkten úıreneri kóp ekenin atap ótti.
Ýnıversıtettiń 20 jyldyq mereıtoıy qarsańynda ashylǵan jańa aýdıtorııa stýdentter úshin erekshe syılyq boldy. Sebebi ǵalymnyń eńbekteri, tarıhı sýretteri, jańa tehnologııalarmen jaraqtanǵan aýdıtorııa, tipti qazirgi pandemııalyq jaǵdaılardy da eskergendikten, bilim alýǵa múmkindik pen yqylasty arttyra túspek.
