JETI MINEZ, JETI BAILYQ, JETI QASIET
Jigitti jerge jyqpas jeti minez:
1. Sabyrly bolý – sabyrsyz jigittiń tabany sazǵa, qoly tazǵa tıedi.
2. Tabandy bolý – jigersiz jigit ózin de, ózgeni de degenine jetkizbeıdi.
3. Turaqty bolý– turaqsyz jigittiń qonysy árdaıym bulaqsyz bolady.
4. Talapty bolý – talapsyz jigit taban astyna ózi baryp túsedi.
5. Týysshyl bolý– týysyna jat jigit, tý kóterip jarytpas.
6. Tabysty bolý– tabyssyz jigit úıde esek, túzde tezek bolady.
7. Namysty bolý– jigit namyssyz bolsa, tirideı óldi, ózin-ózi kómdi de.
Qyzdy súıikti eter jeti baılyǵy:
1. Pák bolý – qyzdyń páktigi Alla bergen eń úlken qazynasy.
2. Ádepti bolý – qyz ádepti bolsa, kóziń qýanyp, júregiń jylıdy.
3. Taza bolý – boıy taza bolmasa, jaqsy áıel bolmaq oıy da tazarmas.
4. Pysyq bolý – jeti jut salaqpen segiz, olaqpen toǵyz bolady.
5. Ustamdy bolý – ózin ustaı almaǵan, kelgen baqty ustap tura almaıdy.
6. Uqypty bolý –joqtan bar jasaı almaǵan, bardy uqsata almaıdy.
7. Imandy bolý – ıman osy altaýynyń túp negizgi bastaýy, altyn tiregi.
Jerge qaraýdan qorǵap qalar jeti qasıet:
1. Kórkem minez - ómirińniń aınasy.
2. Aq nıet – Alladan alaryń.
3. Tazalyq - ımanyńnyń jartysy.
4. Uqyptylyq – Allanyń amanaty.
5. Eńbek – túbi zeınet.
6. Qulshylyq - ózińdi qorǵaý.
7. Bilim - jaryq sáýleń.
Minezi jaman adamnan jaqsy adamdar alys júredi, sol sebepti kórer jaqsylyǵy da az bolady. Minezi qyrys bolsa joly da qyrys, aınalasy tar, arty quz, aldy jar bolady.
Nıeti buzyq pende onysyn aınalasynan jasyrǵanmen Alladan jasyra almaıdy, al nesibe taratýshy onyń nıetine saı etip yrzyq pen qaıǵy, qýanysh beredi.
Tazalyq bar jerde jaqsylyq bar. Las jerden perishteler qashyp, shaıtan shyrmaý salady. Ár adam óziniń boıy men aınalasyn taza ustaýy kerek.
Mańdaı terińmen kelgen Qudaıdyń rızyǵyn ysyrap qylyp, orynsyz shashý nemese tıimdi jarata bilmeý shól dalada aýyzyńa tamyzar sýdy aıaq astyńa aǵyzǵanmen teń.
Eńbek etý muratyńa jetýdiń jalǵyz joly. Eńbeksiz masyl sananyń ólgen deneden aıyrmashylyǵy joq. Eńbek tabysqa ǵana emes tıimdi nátıjege baǵyttalýy kerek.
Qudaıyńa qulshylyq jasaý ózińniń kim ekenińdi, ne isteý kerektigińdi, kimge baratynyńdy umytpaýdyń jalǵyz anyq joly. Qulshylyǵy bardyń, júreginde tynyshtyq bar.
Bilim kózge kórinbes myqty qarýyń, alysty jaqyn eter dúrbiń, qarańǵyńdy jaryq eter sáýleń. Bilim aldyńǵy alty qasıettiń kókjıegin keńeıter negizgi tiregi.
