JAQSY MUSYLMAN MEShITTIŃ IShINDE EMES, TYSYNDA BELGILI BOLADY

«Jaqsy musylman meshittiń ishinde emes, tysynda belgili bolady. Saýda-sattyq, aqsha, pul, kassa, báseke... Mine, osyndaı ortada sen qandaısyń, mańyzdysy osy. Meshittiń ishinde bári múbarak, ol jerde másele joq. Syrtta qandaısyń?» (Nurettın Topshy)

***

Mine, bar másele osynda jatyr. Musylmandardyń din ustanýyndaǵy problemasy osy jerde. Meshittiń ishinde bárimiz dindarmyz, syrtqa shyqqanda dindarlyǵymyzdy meshitte tastap ketemiz. Syrtta árkimmen urysamyz, julysamyz, aqysyn jeımiz, aıaǵynan shalamyz, aıaýsyzdyqqa baramyz.

Jalpy, adamnyń Qudaımen qarym-qatynasy adamdarmen qarym-qatynasynda da kórinisin beredi. Adamdarmen qarym-qatynas durys bolmasa, demek Jaratqanmen qarym-qatynasyńda da problema bar degen sóz.

Abaıdyń:

«Mahabbatpen jaratqan adamzatty,

Sen de súı ol Allany jannan tátti.

Adamzattyń bárin súı baýyrym dep,

Jáne haq joly osy dep ádiletti», – degen óleńinde de joǵaryda aıtylǵan kontseptsııa jatyr.

Allany súımeıinshe, adamzatty da súıe almaısyń. Adamzatqa jaý bolsań, Qudaıǵa da qassyń.

Sopylardyń adam kóńilin jaralamaýǵa qatty kóńil bólýiniń máni osynda. Sebebi, adamnyń negizgi bolmysy sanalǵan kóńili, júregi – Allanyń mahabbatpen jaratqan aıaýly dúnıesi. Kóńil – Allanyń kórkem esimderin shaǵylystyra alatyn aına ispettes.

Paıǵambarymyzdyń: «Allah senderdiń túrlerińe de, maldaryńa da qaramaıdy, tek júrekterińe, kóńilderińe qaraıdy», – deýiniń mánisi de osynda. Iaǵnı, kóńil – Jaratqannyń nazary túsetin aınasy.

Sondyqtan da, Jáláláddın Rýmı Máýlana:

«Qaǵba – Azardyń uly Halıl Ibrahımniń salǵan ǵımaraty. Al kóńil (júrek) bolsa, Allanyń nazary túsetin meken. Sol sebepti, bireýdiń kóńilin buzý myń Qaǵbany qıratýdan da jaman», – degen.

Endeshe, adamnyń kóńilden aıaýly jeri joq. Sondyqtan da, qazaq «Dostyń kóńili sharaına, syndyryp alma, abaıla!» – deıdi.

Saltan SAIRANULY