JANSARAIYŃA MEIIRIM UIaLATATYN EŃ TIIMDI AMAL
Janyńda júrgen jaqyn jandar jasaǵan qııanat — júrekke aýyr salmaq salady. Mundaı kezde pende nápsisi kek alýǵa, qarymta qaıtarýǵa daıyn turady. Al júrek — keshirýge shaqyrady. Osy sátte adamnyń rýhanı deńgeıi, Allaǵa jaqyndyǵy men taqýalyǵy synalady.
Bir kúni ázireti Ábý Bákir qyzy Aıshaǵa jala jaýyp, qaralaǵandardyń qatarynda týysqany – Mıstahty da kórip, qatty renjıdi.
Mıstah – ázireti Ábý Bákirdiń kedeı týysqany edi. Oǵan burynnan kómektesip júretin. Ázireti Ábý Bákir onyń opasyzdyǵyn bilgende:
«Men budan bylaı oǵan bir tıyn da bermeımin!» – dep ant ishedi.
Osy oqıǵaǵa baılanysty Alla Taǵala aıat túsiredi:
«Aralaryńdaǵy ıgi jaqsylar men dáýletti jandar týǵan-týysqa, kedeı-kepshikke jáne Alla jolynda hıjret etkenderge (tipti, olar jaza basyp, aldarynda aıypty bolyp qalsa da) múldem qaraılaspaımyn dep sert etpesin. Kerisinshe, ǵafý etip, keńshilik jasasyn. Álde, Allanyń ózderińe keshirim jasaǵanyn qalamaısyńdar ma?!» (Nur súresi, 22-aıat)
Ábý Bákir bul aıatty estigende kózine jas alyp:
«Álbette, men Allanyń meni keshirgenin qalaımyn» – dep, burynǵydan da kóbirek kómektese bastady. Bul árıne úlken júrekti talap etetin bıik deńgeı.
Endeshe, ázireti Ábý Bákirdeı jasaımyn degender ózderin renjitken adamdy keshirgeni durys. Tipti bul oqıǵadan baıqaǵanymyzdaı, ondaı adamdardyń jasaǵan opasyzdyǵy olarǵa jasap júrgen jaqsylyǵymyzdy toqtatýǵa sebep emes eken. Taǵy da qaıtalap aıtsaq, bul – taqýalyqtyń eń bıik deńgeıi, keshirimniń asqaq mejesi Ábý Bákirlerdiń maqamy.
Iá, ár adam Ábý Bákirdeı bola almas. Biraq sol jolǵa umtylý – kemeldenýdi murat etken ár adamnyń maqsaty bolýǵa tıis.
Eń bolmasa “álsizdigi syr bergen pende ǵoı” dep keshirim jasap, alystan aralasý Emotsııalyq kúıdi saqtaýdyń tıimdi joly.
Biraq, keshirimińdi álsizdik bilip, tóbeńe shyǵyp basynǵysy keletinderge de qateligin kórsetý asa danalyqty talap etetin óte názik is.
Kóńilge qaıaý salyp renjitken adam úshin “Rabbym, pálenshe qulyńnyń qatesin keshirip, Ózińniń salıqaly quldaryńnyń qataryna qos! Meniń de júregimdi ókpe-renishten tazalap, kúnálarymdy keshire gór. Biz seniń meıirim-raqymyńa asa muqtajbyz” dep syrttaı ıgi duǵa jasaý – júrek tazartýdyń shıpaly daýasy. Jansaraıyńa meıirim uıalatatyn eń tıimdi amal.
Qaırat JOLDYBAI
